हेटौँडाः मातृभूमि साहित्य समाज मकवानपुरले प्रत्येक दुई वर्षमा प्रदान गर्ने “मातृभूमि राष्ट्रिय सम्मान २०८०” यस वर्ष वरिष्ठ संस्कृतिविद् प्रज्ञा प्रतिष्ठानका पूर्वउपकुलपति प्रा.डा. जगमान गुरुङलाई प्रदान गर्ने भएको छ । नेपाली संस्कृति क्षेत्रमा महत्वपूर्ण योगदान पु¥याएवापत गुरुङलाई नगद २५ हजार १ रुपैयाँ राशिको पुरस्कार प्रदान गर्न लागिएको मातृभूमि साहित्य समाजले जनाएको छ ।
नेपाल प्रज्ञा प्रतिष्ठानका पूर्व उपकुलपति प्रा.डा. जगमान गुरुङ नेपाली इतिहास एवम् संस्कृति क्षेत्रका गहन अध्येता हुनुहुन्छ । विभिन्न प्रतिष्ठान तथा विश्वविद्यालयको महत्वपूर्ण जिम्मेवारी सम्हाल्नुभएका प्रा.डा. गुरुङको शोधपत्र लेखन एवम् अनुसन्धान कार्यमा गहन भूमिका रहेको छ । यसैगरी संस्थाका कार्यसमिति सदस्य किशन पौडेलद्वारा स्थापना गरेको नगद ११ हजार १ सय ११ रुपैयाँ राशिको “मातृभूमि लघुकथा रत्न सम्मान–२०७९” लघुकथालयका सर्जक वरिष्ठ लघुकथाकार डा. विदुर चालिसेलाई समर्पण गर्ने निर्णय गरेको छ । डा. चालिसेले लामो समयदेखि लघुकथाको क्षेत्रमा महत्वपूर्ण योगदान दिँदै आउनु भएको छ । प्राध्यापनबाट सेवा निवृत्त जीवन बिताइरहनु भएको डा. चालिसेका नेपाली भाषामा प्रकाशित विभिन्न लघुकथा सङ्ग्रह, कविता, भाषा, अनुसन्धान र समालोचनाका पुस्तकहरू प्रकाशित छन् ।
आगामी असोज ६ गते मातृभूमि साहित्य समाजको २५औँ वार्षिकोत्सवको अवसरमा हेटौँडामा भव्य कार्यक्रम आयोजना गरेर दुवै पुरस्कार समर्पण गर्ने निर्णय भएको मातृभूमि साहित्य समाजका अध्यक्ष माधव पोख्रेलले जानकारी दिनुभएको छ । मातृभूमिको वार्षिकोत्सवकै अवसरमा महाकाव्यकार मुना अर्यालको दोस्रो महाकाव्य “महाकाश” को विमोचन पनि गरिने बताइएको छ ।
