मकवानपुरबाट निर्वाचित सिंह पूर्वाधार विकास समितिको सभापति बन्नुहुँदै

हेटौँडाः मकवानपुर क्षेत्र नम्बर १ बाट प्रतिनिधि सभा सदस्य निर्वाचित दीपक बहादुर सिंह संसदको पूर्वाधार विकास समितिको सभापति बन्दै हुनुहुन्छ । दलहरुबीच समितिको नेतृत्वको विषयमा भागबण्डामा गर्ने क्रममा राष्ट्रिय प्रजातन्त्र पार्टी (राप्रपा) को भागमा परेको थियो । राप्रपाले मकवानपुरबाट निर्वाचित सिंहलाई सभापतिको उम्मेदवार बनाएको हो ।

दलहरुबीच संसदीय समितिको नेतृत्वमा पूर्वसहमति भएकोले सिंह पूर्वाधार विकास समितिको सभापति बन्नुहुने निश्चित जस्तै छ । प्रतिनिधिसभा सदस्य निर्वाचन भएको नौं महिनापछि मात्र संसदीय समितिको नेतृत्व चयन प्रक्रिया अघि बढेको हो । प्रतिनिधिसभाको बिहीबारको बैठकमा सभामुखले १० वटै विषयगत समिति सभापतिको निर्वाचन सोमबार दिउँसो ३ बजेका लागि निर्धारण गरेको घोषणा अनुरुप निर्वाचन प्रक्रिया अघि बढेको हो । माओवादीका माधव सापकोटा सिंहको प्रस्तावक बन्नुभएको छ ।