हेटौंडाः पुर्व पश्चिम राजमार्ग अन्तर्गत हेटौंडा–१५, रातमाटे चेकपोष्टबाट प्रहरीले काँसको थाल र कचौरा सहित् एकजनालाई नियन्त्रणमा लिएको छ । काँकडभित्ताबाट काठमाण्डौंतर्फ जाँदै गरेको ग १ ख ९६३४ नं को यात्रुबाहक बसमा लुकाई छिपाई राखिएको अवस्थामा काँसका थाल २५० थान र कचौरा ३९४ थान फेला पारी बरामद गरिएको हो ।
प्रहरीले अवैधरुपमा ती सामानहरु ओसारपसार गरेको आरोपमा सोही बसमा यात्रा गरिरहेका मोरङ उर्लाबारी–७ का वेद कार्कीलाई नियन्त्रणमा लिएको छ । प्रहरीले बरामद सामान करीव ३ लाख ५० हजारको भएको जनाएको छ । यसै गरी प्रहरी टोलीले चुरियामाई पिपलचौतारामा बिरगंजबाट हेटौडा आउदै गरेको ना १ ज ८६९० नं.को माईक्रोबाट अवैघ कपडा बरामद गरेको छ । माइक्रोमा प्रहरीले शंका लागि चेकजाँच गर्दा डिक्किमा लुकाई छिपाई राखेको कुर्ता सेट–३६ थान र साडी–२४ थान बरामद गरेको हो । कपडाको मुल्य अन्दाजी साठी हजार रुपियाँ रहेको प्रहरीले जनाएको छ ।
