हेटौंडाः मकवानपुरका शम्भु नकर्मी लायन्स क्लब इन्टरनेशनल डिष्ट्रिक्ट ३२५ बी २ को डिष्ट्रिक्ट गभर्नर चयन हुनुभएको छ । आज भएको भर्चुअल निर्वाचनमा उल्लेख्य समर्थन मतसहित नकर्मी वर्ष २०२०/२१ का लागि गभर्नर चयन हुनुभएको हो । लायन्स क्लब मकवानपुरका संस्थापक अध्यक्ष नकर्मीले कुल ५३१ मत मध्ये ५२८ मत समर्थनमा पाउनु भएको थियो भने ३ मत उहाँको समर्थनमा आउन सकेन ।
यसअघि नकर्मी फस्ट भाइस डिष्ट्रिक्ट गभर्नर हुनुहुन्थ्यो । नकर्मी मकवानपुर जिल्लाबाट लायन्स क्लबको डिष्ट्रिक्ट गभर्नर चयन हुनुभएको हो । सामाजिक सेवामा समर्पित अन्तर्राष्ट्रिय स्वयमसेवी संस्था लायन्स क्लब क्लब इन्टरनेशनल डिष्ट्रिक्ट ३२५ बी २ मातहत मकवानपुरसहित नेपालका पश्चिम क्षेत्रका एक दर्जन भन्दा बढी जिल्लाका लायन्स क्लबहरु रहेका छन् ।
आजै डिष्ट्रिक्ट गभर्नर नकर्मीले सचिवमा टासी डोल्मा तुम्बाहाङफे, कोषाध्यक्षमा शिव विडारीलाई मनोनित गर्नुभएको छ ।यस्तै नकर्मीले डिष्ट्रिक्ट अन्तर्गतको सात वटा एरियाका चिफहरुमा अमरजंग रञ्जित, अंकिता सुमार्गी, प्रभाकर पण्डित, सन्दिप कशोधन, युवराज थपलिया, हरिहर बस्नेत, चेतराज पनेरुलाई मनोनित गर्नुभएको छ । आजै निर्वाचन अधिकृत अरुण प्रताप राणाले डिष्ट्रिक्ट गभर्नर शम्भु नकर्मीलाई निर्वाचित भएको प्रमाणपत्र हस्तान्तरण गर्नुभएको छ ।
