हेटौँडाः मकवानपुर प्रहरीले ५४ लाख मूल्य बराबरको ५६१ दशमलव ३० ग्राम सुनसहित एक जनालाई पक्राउ गरेको छ । पक्राउ पर्नेमा बीरगंज महानगरपालिक–१६ का २२ वर्षीय किशन साह रहेको जिल्ला प्रहरी कार्यालय मकवानपुरले जनाएको छ । बुधबार बिहान साढे ३ बजेको समयमा सूचनाको आधारमा प्रहरीले हेटौँडा–१५, स्थित प्रहरी चेक पोष्टमा काठमाडौंबाट आउँदै गरेको प्रदेश २–०३–००१ ख ०१५९ नम्बरको यात्रुबाहक बसमा आएका साहको साथमा सुन फेला परेको प्रहरीले जनाएको छ ।
साहको शरीर तथा झोलाको सुरक्षा जाँच गर्दा उसले लगाएको जुत्ताको नोक भित्र ३ थान सुन फेला परेको हो । बरामद गरिएको सुनको मुल्य ५४ लाख ४८ हजार रुपैयाँ रहेको छ । सुनसहित साहलाई पक्राउ गरी अनुसन्धान कार्य भइरहेको प्रहरीले जानकारी दिएको छ ।
यस्तै मकवानपुर प्रहरीले मंगलबार राती साढे १० बजेको समयमा हेटौँडा–१५ स्थित चेकपोष्टबाट एक लाख रुपैयाँ बराबरको अवैध कपडा बरामद गरेको छ । बीरगंजबाट पोखरातर्फ जाँदै गरेको ग २ ख ६९२ नम्बरको यात्रुबाहक बसमा सुरक्षाजाँच गर्ने क्रममा अबैध कपडा बरामद भएको प्रहरीले जनाएको छ । बसको डिक्कीभित्र लुकाई छिपाई ल्याएको अवस्थामा साडी १ सय पिस, सल ६ सय पिस गरी १ लाख ५ हजार रुपैयाँ बराबरको कपडा बरामद भएको प्रहरीले जनाएको छ । अबैध कपडा बरामद गरी थप अनुसन्धान कार्य भइरहेको प्रहरीले जानकारी दिएको छ ।
