हेटौंडाः आयोजक बागमती प्रदेशले बागमती राष्ट्रिय रग्बी सेभेन्स प्रतियोगिताको महिलातर्फ उपाधि जितेको छ । आइतबार भक्तपुरको सानोठिमीमा भएको फाइनल खेलमा आर्मीलाई २१–५ ले हराउँदै बागमतीले उपाधि जितेको हो ।
बागमती प्रदेश खेलकुद विकास परिषद्को आयोजना तथा नेपाल रग्बी संघको व्यवस्थापनमा प्रतियोगिता भएको हो । बागमती प्रदेशको टिममा मकवानपुरका ५ जना खेलाडी समावेश थिए । पुरुषतर्फको उपाधि भने कर्णाली प्रदेशले जितेको छ । आइतबार भएको फाइनल खेलमा विभागीय टोली त्रिभुवन आर्मीलाई सडेन डेथमा ५–० ले हराउँदै कर्णालीले उपाधि जितेको हो ।
निर्धारित १४ मिनेटको खेल १४–१४ स्कोरको बराबरीपछि खेल सडेनडेथमा धकेलिएको थियो । प्रतियोगिताका विजेताले ५० हजार रुपैयाँसहित शिल्ड, मेडल र प्रमाणपत्र प्राप्त गरेको छ भने उपविजेताले ३० हजार नगद प्राप्त गरेको छ ।
