हेटौंडाः विश्व वातावरण दिवस–२०८० को अवसरमा आयोजना गरिएको खुला कविता प्रतियोगितामा रिजन राना प्रथम भएका छन् । टोल विकास संस्था नगर समन्वय समिति हेटौंडा उपमहानगरपालिकाको आयोजना तथा सर्जक सञ्जाल मकवानपुरको संयोजनमा बुधबार प्रतियोगिता भएको हो । प्रतियोगितामा किशन पौडेल द्वितीय, बैकुण्ठ लामिछाने तृतीय भएका छन् । स्वस्तिका बानियाँ र ईश्वर थापा सान्त्वना हुन सफल भएका छन् ।
प्रथम, द्वितीय, तृतीय र सान्त्वना हुनेलाई क्रमशः १५ हजार रुपैयाँ, १० हजार रुपैयाँ, ७ हजार ५ सय रुपैयाँ र ५ हजार रुपैयाँ पुरस्कारसहित प्रमाणपत्रले पुरस्कृत गरिएको छ । निमेष निखिल, श्यामकुमार बानियाँ र शान्ति प्रियवन्दनाले निर्णायकको भूमिका निर्वाह गर्नुभयो । हेटौंडा–४ का वडाध्यक्ष नवीन सिग्देलको प्रमुख आतिथ्य तथा समितिका अध्यक्ष ध्रुव अधिकारीको सभाध्यक्षमा प्रतियोगिता भएको हो ।
