हेटौंडाः लायन्स क्लब ईन्टरनेशनल डिष्ट्रिक्ट ३२५बी२ नेपालको २०२०/२१ का लागि डिष्ट्रिक्ट गभर्नरमा मकवानपुरका शम्भु नकर्मीले मंगलबार उम्मेदवारी दर्ता गराउनुभएको छ । अन्तर्राष्ट्रिय स्वयम्सेवी संस्था लायन्सको ३२५बी२ को गभर्नरको रुपमा मकवानपुर जिल्लाबाटै पहिलो व्यक्तिको रुपमा नकर्मी निर्वाचित हुँदै हुनुहुन्छ । लायन्स क्लबमा गभर्नर हुने लाइनमा निर्वाचित भएपछि स्वतः गभर्नर हुने व्यवस्था छ । नकर्मी वर्ष २०१९/२० मा लायन्स क्लब ईन्टरनेशनल डिष्ट्रिक्ट ३२५बी२ को फस्ट भाइस डिष्ट्रिक्ट गभर्नर हुनुहुन्थ्यो । लकडाउनका कारण अनलाइनमार्फत उम्मेदवारी दर्ता गराइएको हो ।
यस्तै लायन्स क्लब ईन्टरनेशनल डिष्ट्रिक्ट ३२५बी२ को फस्ट भाइस डिष्ट्रिक्ट गभर्नरका लागि चितवनका रामप्रसाद भट्टले उम्मेदवारी दर्ता गराउनुभएको छ । यसअघि उहाँ सेकेण्ड भाइस डिष्ट्रिक्ट गभर्नर हुनुहुन्थ्यो । सेकेण्ड भाइस डिष्ट्रिक्ट गभर्नरका लागि धनगढीका सिबि चन्दले उम्मेदवारी दिनुभएको छ । लायन्स क्लब ईन्टरनेशनल डिष्ट्रिक्ट ३२५बी२ नेपालको वर्ष २०२०/२१ मा नयाँ नेतृत्व चयनका लागि भिडियो कन्फ्रेन्सबाट कन्भेन्सन हुने भएको छ । कोरोना भाइरसको संक्रमणको जोखिमका कारण सभा, सम्मेलन तथा भेला हुन सम्भव नभएका कारण अनलाइन माध्यमको सहयोगमा भिडियो सम्मेलनको तयारी भइरहेको लायन्स क्लबले जनाएको छ ।
उम्मेदवारी दर्ताकै दिन मंगलबार डिष्ट्रिक्ट गभर्नर, फस्ट भाइस डिष्ट्रिक्ट गभर्नर र सेकेण्ड भाइस डिष्ट्रिक्ट गभर्नरले आफ्नो कार्यकालको नीति तथा कार्यक्रमबारे सबैमा जानकारी गराएका छन् । लायन्स क्लबमा नेतृत्व तथा अन्य पदाधिकारीहरु सर्वसम्मत रुपमा चयन गर्ने प्रलचन रही आएको लायन्स क्लब इन्टरनेशनल ३२५बी२ नेपाल एरिया २ का एरिया को–चिफ एडभाईजर राम श्रेष्ठले बताउनु भयो । नयाँ नेतृत्व चयनका लागि अबको १० दिनपछि भिडियो कन्फ्रेन्सबाट अन्तिम नामावली प्रकाशन हुनेछ ।
