हेटौंडाः सिस्नुपानी मकवानपुरले आफ्नो स्थापना दिवसको अवसर पारेर आयोजना गरेको खुला हास्यव्यंग्य कविता प्रतियोगितामा १४ जिल्लाका २५ कविका कविता अन्तिम चरणको प्रतिस्पर्धाका लागि छनोट भएको छ ।
मंगलबारसम्म प्राप्त ८१ वटा कवितामध्ये आयोजकले २५ वटा कविता छनोट गरेको हो । आयोजकले मकवानपुरका ६ जना, भक्तपुरका ३ जना, कास्कीका ३ जना, नवलपरासीका २ जना, पाँचथरका २ जना, गुल्मी, पर्वत, गोरखा, तनहुँ, उदयपुर, रुपन्देही, धादिङ, सुनसरी र धनकुटाका १/१ जना कविका कविता छनोट गरेको छ ।
छनोट भएका कविताहरु आउँदो शुक्रबार एक समारोहका बीच प्रतियोगितामा सहभागी कविले वाचन गर्ने सिस्नुपानी नेपाल मकवानपुरका सह–सचिव संप्रस पौडेलले जानकारी दिनुभएको छ । हेटौंडा उपमहानगरपालिका वडा नम्बर ४ को विशेष प्रवद्र्धनमा प्रतियोगिता आयोजना हुन लागेको हो । मकवानपुरबाट गायत्री नेपालले रक्सी, प्रभास घिमिरेले बाँदर, बैकुण्ठ लामिछानेले प्रिय देशबासीहरु, रस्मिता तिमल्सेनाले गज्जबको लोकतन्त्र, सविता तिमल्सेनाले हेटौंडाको कहानी र समर्पण न्यौपानेले टेन्सन नहोस् शीर्षकको कविता वाचन गर्नुहुनेछ । यस्तै, कास्कीबाट छविलाल आर्चायले खन्चुवा, मदन घिमिरेले सरकार निदाएको छैन र संयोग बस्यालले हामी कविता वाचन गर्नुहुने सिस्नुपानी नेपाल मकवानपुरले जनाएको छ ।
प्रतियोगितामा भक्तपुरबाट कविराज घिमिरेले मान्छे, डिल्लीप्रसाद मुलतिहुनले जाँडरक्सी महोत्सव र रामशरण न्यौपानेले राजनीतिको डढेलो वाचन गर्नुहुनेछ । धनकुटाबाट अनिल अदृश्यको श्रीमतीको अनुहार, पाँचथरबाट कमल घिमिरेको नेताज्यूलाई स्वागत छ र भरत रिजालको असफल प्रेमीको बकपत्र प्रतियोगिताका लागि छनोट भएको बताइएको छ । यसैगरी, गुल्मीबाट काशीनाथ मिश्रितको कुर्सी, नवलपरासीबाट टंकराज ढकालको अझै झिंगगे दाउ र सन्तोष खनालको सत्ताको स्वाद कविता वाचन गरिनेछ सहसचिव पौडेलले जानकारी दिनुभयो ।
प्रतियोगितामा पर्वतबाट तारानाथ पराजुलीले हामी, गोरखाबाट निशान निष्कर्षले बा होइन पितामह, तनहुँबाट युगेश आचार्यले प्रजातन्त्र शीर्षकको कविता प्रतियोगितामा वाचन गर्नुहुनेछ । उदयपुरबाट रमेश व्यङ्ग्यचरीको उहाँ जस्तै हुन नसक्दा, रुपन्देहीबाट रमेश समर्थनको श्रीमतीको सनक, धादिङबाट राजु झल्लुप्रसादको साम्यवादी रुख र सुनसरीबाट सुरज पराजुलीको फलानो शीर्षकको कविता वाचन हुने उहाँले बताउनुभयो ।
प्रतियोगितामा सहभागी हुन आउने कविलाई खाने बस्ने व्यवस्था मिलाइएको सिस्नुपानी मकवानपुरका अध्यक्ष राजकुमार लामिछानेले बताउनुभएको छ । प्रतियोगितामा प्रथम हुनेले नगद १५ हजार रुपैयाँसहित प्रमाणपत्र प्राप्त गर्नेछ भने द्वितीय, तृतीय हुनेले क्रमशः १० हजार रुपैयाँ र ५ हजार रुपैयाँ पुरस्कार राशी रहेको छ भने सान्त्वना हुने दुईजनाले ३/३ हजार रुपैयाँ प्राप्त गर्नेछ ।
