हेटौंडाः सामुदायिक विद्यालयको आलोचना चरम हुने गरेको छ । पछिल्ला दुई दशक सामुदायिक विद्यालयको आमरुपमा आलोचना भइरहँदा पनि सुधारको संकेत आमरुपमा देखिन्न । तर, केही नगन्य सुधार भने पक्कै भइरहेका छन् । यस्तै मध्येको एक हो हेटौंडा–४, कर्रास्थित श्रमिक मावि । श्रमिक माविले पछिल्लो समय विद्यालयको समग्र सुधारको प्रयास गरिरहेको छ ।
विद्यालयप्रति अभिभावकको विश्वास बढाउन श्रमिक माविले पूर्वप्राथमिक तहको कक्षामा सीसी क्यामरा जडान गरेको छ । सीसी क्यामराले कैद गर्ने दृश्य विद्यालयका शिक्षकले मात्रै नभई अभिभावकले समेत घर, कार्यालय वा आफ्नो अनुकुलको स्थानमा बसेर हेर्न सक्ने व्यवस्था मिलाइएको छ । पूर्वविद्यार्थीको सहयोगमा केही समयअघि सीसी क्यामरा जडान गरिएको हो । पूर्वप्राथमिक कक्षामा जडान गरिएको सीसी क्यामरा परीक्षणको रुपमा गत शैक्षिकसत्रको अन्तिममा अभिभावकलाई पहूँच दिइएको छ ।
श्रमिक माविका प्रधानाध्यापक श्रीराम दाहाल सीसी क्यामराको पहूँच अभिभावकलाई दिँदा विद्यालयप्रति अभिभावकको विश्वास बढ्ने र सकारात्मक धारणा विकसित हुने अपेक्षा गरिएको बताउनुहुन्छ । विद्यालयले पूर्वप्राथमिक कक्षालाई बालमैत्री र प्रभावकारी सिकाईका लागि सहयोगी हुने गरी तयार गरिएको उल्लेख गर्नुहुँदै प्रधानाध्यापक दाहाल भन्नुहुन्छ, “अभिभावकहरु निजी विद्यालयमा जस्तै सुविधा, सुरक्षा, स्याहार, पठनपाठन भए नभएको भनी निक्कै चासो, जिज्ञासा राख्नुहुन्छ । हामीले पनि सक्दो प्रयास गर्ने हो । पूर्वविद्यार्थीले सहयोग गरेपछि सीसी क्यामरा जडान गरेर अभिभावकलाई नै सहज पहूँच दिएका छौं ।” गत शैक्षिक सत्रमा २ सय ५० विद्यार्थीबाट ४ सय २७ विद्यार्थी भर्ना गराउन सफल श्रमिक मावि शैक्षिक सत्र २०८० मा विद्यार्थी संख्या ६ सय पु¥याउने योजनामा छ ।
