हेटौंडाः मकवानपुरको मनहरी गाउँपालिका–६, प्रतापपुरमा भालुको आक्रमणबाट एकजना घाइते भएका छन् । चितवन राष्ट्रिय निकुञ्जको मध्यवर्ती क्षेत्रमा पर्ने जंगलमा भैंसी खोज्न गएका प्रतापपुरका ४३ वर्षीय बलबहादुर राईलाई शनिबार बिहान ८ बजेर ४५ मिनेटको समयमा जंगली भालुले आक्रमण गरी घाइते बनाएको जिल्ला प्रहरी कार्यालय मकवानपुरले जानकारी दिएको छ ।
मध्यवर्ती क्षेत्रमा शुक्रबार दिउँसो गाई–भैंसी चराउनका लागि पठाइकोमा रातीसम्म पनि ३ वटा भैंसी फर्केर नआएपछि शनिबार बिहान बल बहादुर राई र ३५ वर्षीय जय राई जंगल गएको प्रहरीले जनाएको छ । अचानक जंगली भालुले बल बहादुर राईलाई आक्रमण गर्दा राईको टाउको र हातमा भालुले टोकेर घाइते बनाएको र अवस्था मध्यम रहेको प्रहरीले जानकारी दिएको छ । बल बहादुरलाई उपचारका लागि भरतपुर अस्पताल पठाइएको छ ।
