हेटौंडाः हेटौंडा–१९, बस्तीपुरस्थित निर्मल बहुमुखी क्याम्पसमा स्वतन्त्र विद्यार्थी युनियन (स्ववियु) को नवनिर्वाचित समितिको पदस्थापन कार्यक्रम सोमबार बिहान भएको छ । नवनिर्वाचित समितिका पदाधिकारीलाई एक कार्यक्रमका बीच निर्वाचन समितिले निर्वाचित भएको प्रमाणपत्र वितरण गर्नुका साथै सपथग्रहण गराएर पदभार ग्रहण गराएको हो ।
चैत ५ गते सम्पन्न निर्वाचनबाट स्ववियु अध्यक्षमा सरोज आर्याल, सचिवमा सुशान्त पौडेल, कोषाध्यक्षमा सूर्य बल र सदस्यहरु मिरा बिसंखे, कपास प्रजा, सुनिता बल, महेश सापकोटा र शर्मिला चौलागाई निर्वाचित हुनुभएको थियो । निर्वाचित समितिलाई सोमबार बिहान प्रमाणपत्र वितरण गरी सपथ ग्रहण गराइएको निर्मल बहुमुखी क्याम्पसका सहायक क्याम्पस प्रमुख राममणि बर्तौलाले जानकारी दिनुभयो ।
समानुपातिकतर्फ अनेरास्ववियुबाट प्रशान्त बञ्जारा, लिलामाया थिङ, राजु प्रजा, कुमारी बल र अखिल क्रान्तिकारीबाट मिना आर्याल र आयुष गोले निर्वाचित हुनुभएको छ । निर्मल बहुमुखी क्याम्पसमा प्रत्यक्षतर्फ ७ र समानुपातिकतर्फ ७ गरी १४ जना निर्वाचित भएका छन् । निर्वाचित सदस्यहरुमध्येबाट स्ववियुको उपाध्यक्ष र सहसचिव चयन गरिनेछ ।
