हेटौंडाः बागमती प्रदेशसभाको सभामुखको निर्वाचनका लागि आज बिहीबार मनोनयन दर्ता हुने भएको छ । बागमती प्रदेशसभाका सचिव कृष्णहरी खड्काले सभामुखको निर्वाचनका लागि बिहीबार २ बजेसम्ममा मनोनयन दर्ता गराउनुपर्ने कार्यतालिका रहेको जानकारी दिनुभयो ।
पुस १८ गते सोमबार बसेको सर्वदलीय बैठकले सभामुखको निर्वाचनको प्रक्रिया पुस २७ गतेदेखि नै सुरुवात गर्ने निर्णय गरेपनि त्यसलाई संशोधन गरेर एक दिनपछि सारिएको सचिव खड्काले बताउनुभयो । सभामुख चयनका लागि भोलि शुक्रबार निर्वाचन हुने उहाँले बताउनुभयो । नेपालको संविधानको धारा १८२ को उपधारा १ बमोजिम प्रदेशसभाको पहिलो बैठक प्रारम्भ भएको मितिले १५ दिनभित्र प्रदेशसभाका सदस्यहरु मध्यबाट सभामुख निर्वाचन गर्नुपर्ने व्यवस्था रहेको छ ।
सोही व्यवस्था बमोजिम प्रदेश सभा सचिवालयले आज बिहीबार बिहान साढे १० बजेदेखि २ बजेसम्म मनोनयन दर्ता गर्ने समय तोकेको छ । यस्तै, दिउँसो साढे २ बजेदेखि साढे ३ बजेसम्म मनोनयन फिर्ता गर्ने र ४ बजे अन्तिम नामावली प्रकाशन गर्ने कार्यक्रम तालिका सार्वजनिक गरेको छ । सभामुखको निर्वाचन भोलि शुक्रबार बिहान ११ बजे हुने सचिवालयले जनाएको छ ।
बागमती प्रदेशसभाको सभामुखमा सत्तारुढ गठबन्धनबाट राष्ट्रिय प्रजातन्त्र पार्टीका महामन्त्री भुवन पाठकको उम्मेदवारी रहनेछ । राप्रपाले बुधबार पार्टीका महामन्त्री समेत रहनु भएका पाठकलाई सभामुखको उम्मेदवार बनाउने निर्णय गरेको हो । सत्तारुढ दलहरुबीच मुख्य पदहरु भागवण्डा हुँदा बागमतीमा सभामुख राप्रपाले लिने सहमति भएको थियो । पाठक बागमती प्रदेश सभामा समानुपातिकबाट सदस्य बन्नु भएको हो । पाठकले २०३६ सालदेखि विद्यार्थी संगठनबाट राजनीति सुरु गर्नुभएको थियो ।
प्रदेशसभा सचिवालयका सचिव कृष्णहरि खड्काका अनुसार बागमती प्रदेश सभाको उपसभामुख चयनका लागि भने कुनै निर्णय भएको छैन । बिहीबार सर्वदलीय बैठक बोलाइएको र बैठकले उपसभामुखको निर्वाचनबारे निर्णय गर्ने सचिव खड्काले बताउनुभयो । सर्वदलीय बैठक बिहीबार ४ बजे बस्दैछ ।
