हेटौंडाः मकवानपुरका लायन्स तथा लियो क्लबको अग्रसरतामा हेटौंडाका थप चार स्थानमा हात धुने स्टेशन स्थापना गरिएको छ । आज बिहान जिल्ला प्रशासन कार्यालय मकवानपुर अगाडि, जिल्ला प्रहरी कार्यालय अगाडि, हेटौंडा औद्योगिक क्षेत्रको गेट र हुप्रचौरस्थित खेलकुद विकास समिति अगाडि हात धुने स्टेशन स्थापना गरिएको छ । फलामबाट समेत कोरोना भाइरसको संक्रमण हुन सक्ने भनिएपछि हेटौंडामै खुट्टाले थिचेर धारा खोल्न मिल्ने गरी धारा तयार पारिएको छ ।
यसअघि लायन्स क्लबले हेटौंडाको बुद्धचोक, बसपार्क, हेटौंडा अस्पताल र मानसचोकमा हात धुने स्टेशन स्थापना गरिएको थियो । करिब २ लाख रुपैयाँ लागतमा लायन्स क्लबले ८ स्थानमा हात धुने स्टेशन स्थापना गरिएको नकर्मीले जानकारी दिनुभयो । लायन्स क्लब ईन्टरनेशनल ३२५ बी २ का फस्ट डिष्ट्रिक्ट गभर्नर शम्भु नकर्मीका अनुसार लायन्स क्लबकै सदस्यहरुको साथ र सहयोगमा हात धुने स्टेशन स्थापना गरिएको जानकारी दिनुभयो । कोरोना भाइरसको संक्रमणको जोखिम न्यून गर्न लायन्स क्लबले सार्वजनिक स्थानमा हात धुने स्टेशन स्थापना गरेको हो । हात धुने स्टेशनलाई निरन्तर व्यवस्थित रुपमा राखिने पनि उहाँले बताउनुभएको छ । हात धुने स्टेशनका लागि हेटौंडा खानेपानी व्यवस्थापन बोर्डले निशूल्क रुपमा पानी उपलब्ध गराएको छ ।
