हेटौंडाः आठौं हेटौंडा राष्ट्रिय भेट्रान्स कप ८ ए साइड रनिङ शिल्ड फुटबल प्रतियोगितामा बुधबार ४ खेल सम्पन्न भएको छ । बुधबार भएको चारमध्ये तीन खेलको निर्धारित समय बराबरीमा सकिएपछि नतीजाका लागि टाइब्रेकरको साहारा लिनुपरेको थियो ।
बुधबारको पहिलो खेलमा एक्स भेट्रान्स पोखरा र नागश्वती भेट्रान्स हेटौंडा गोलरहित बराबरी भएको थियो । निर्धारित समय गोलरहित बराबरी भएपछि टाइबेकरमा एक्स भेट्रान्स पोखराले नागश्वती भेट्रान्स हेटौंडालाई ५–४ गोलअन्तरले हराएको हो । बुधबारको दोस्रो खेल पनि गोलरहित बराबरी भएको थियो । टाइब्रेकरमा हेटौंडा भेट्रान्सले वीरगंज युथ पर्सालाई ५–४ गोलअन्तरले हराएको हो ।
बुधबार भएको तेस्रो खेलमा भने एमएमसी काठमाडौंले वीरगंज सिटी भेट्रान्सलाई २–० गोलअन्तरले पराजित गरेको छ । बुधबार भएको चौथो खेलमा अभिषेक चर्च र बानेश्वर भेट्रान्स काठमाडौबीच १–१ को बराबरी भएपछि टाइब्रेकरमा ७–६ गोलअन्तरले बानेश्वर भेट्रान्स काठमाडौं विजयी भएको छ ।
प्रतियोगिताको फाइनल खेल पुस २३ गते हुनेछ । प्रतियोगितामा प्रथम हुने टिमले नगद १ लाख ११ हजार १ सय ११ रुपैयाँसहित शिल्ड, मेडल र प्रमाणपत्र प्राप्त गर्नेछ । दोस्रो हुने टिमले नगद ५५ हजार ५ सय ५५ रुपैयाँसहित शिल्ड, मेडल र प्रमाणपत्र प्राप्त गर्नेछ ।
