हेटौंडाः मकवानपुर जिल्ला बचत तथा ऋण सहकारी संघ लिमिटेडले राष्ट्रिय आविष्कार केन्द्रलाई ३० हजार रुपैयाँ सहयोग गरेको छ । देशमै विज्ञान र प्रविधिको क्षेत्रमा नविनतम् आविष्कारको कार्य गर्न भनी महावीर पुनले स्थापना गर्नुभएको राष्ट्रिय आविष्कार केन्द्रले कोरोना भाइरसको जोखिम न्यूनीकरण गर्न व्यक्तिगत सुरक्षा सामग्री (पीपीई) निर्माण गरी सरकार र स्वास्थ्य सेवा प्रदायक संस्थालाई सहयोग गरिरहेकोले आविष्कार केन्द्रको उक्त कार्यको सराहना गर्दै सहयोग गरिएको संघले जनाएको छ ।
संघले बिहिबार आविष्कार केन्द्रको खातामा रकम जम्मा गरिदिएको हो । संघले आफ्नै बजेट र संघमा आवद्ध प्रारम्भिक सहकारी संस्थासँग सहयोग संकलन गरी कोरोना भाइरसको संक्रमणको जोखिमबाट बच्न स्थानीय तहले सञ्चालन गरेको अभियानमा मकवानपुरका दसवटै स्थानीय तहलाई समेत सहयोग गरिरहेको छ । संघले बिहिबार नै मकवानपुरको कैलाश गाउँपालिकालाई २८ हजार छ सय रुपैयाँ र राक्सिराङ गाउँपालिकालाई ३१ हजार छ सय रुपैयाँ सहयोग गरेको छ । यसअघि संघले हेटौंडा उपमहानगरपालिका, थाहा नगरपालिका, बकैया गाउँपालिका, भीमफेदी गाउँपालिकालाई सहयोग गरिसकेको छ ।
