हेटौंडाः मकवानपुर जिल्लाको विकट क्षेत्र राक्सिराङ गाउँपालिकामा राहत वितरण गरेर फर्कँदै गरेका एकजनाको मृत्यु भएको छ । अन्दाजी ६० वर्षीय खड्ग बहादुर कटुवालको हिजो बिहिबार साँझ साढे ६ बजेको समयमा राक्सिराङ गाउँपालिकाको सिलिंगे भन्ने स्थानमा हृदयघात भई एक्कासी लडेर मृत्यु भएको हो ।
दिगो विकासका लागि एकता नेपालमा कार्यरत प्राविधिक कटुवाल धनकुटाकोक पाख्रिवासका स्थायीबासी हुनुहुन्थ्यो । राक्सिराङ ७ दामराङमा राहत वितरण गरी फर्कने क्रममा सिलिंगेमा हृदयघातका कारण मृत्यु भएको पूर्वसांसद गोविन्दराम चेपाङले बताउनुभयो । इलाका प्रहरी कार्यालय मनहरीका अनुसार हिजो साँझ प्रहरीलाई जानकारी भएपछि घटनास्थलतर्फ प्रहरी गएको छ । आज बिहानसम्म प्रहरी घटनास्थलसम्म पुग्न सकेको छैन । मृतक कटुवालका परिवार पनि धनकुटाबाट आउँदै गरेकोले शव अझै घटनास्थलमै रहेको इलाका प्रहरी कार्याल्य मनहरीका हवलदार राजकुमार क्षेत्रीले जानकारी दिनुभएको छ ।
