हेटौंडाः हेटौंडा उपमहानगरपालिकाले शुक्रबार बार्षिक समीक्षा गरेको छ । उपमहानगरपालिकाले कार्यपालिका सदस्य र सीमित कर्मचारीको उपस्थितिमा वार्षिक समीक्षा गरेको हो । स्थानीय सरकारको वार्षिक कार्यको समीक्षामा सरोकारवाला र सञ्चारकर्मीलाई समेत जानकारी नगराई गोप्यरुपमा गरिएको छ ।
उपमहानगरपालिकाकी प्रमुख मीना कुमारी लामाले सञ्चारकर्मीलाई जानकारी गराउन निर्देशन दिए पनि कर्मचारीले पत्रकारलाई जानकारी नगराएको बताउनुभयो । ‘वार्षिक समीक्षामा सञ्चारकर्मीलाई जानकारी गराउन भनेको थिएँ । समीक्षामा सञ्चारकर्मीको उपस्थित भएको देखिनँ । कर्मचारीले सञ्चारकर्मीलाई जानकारी नै गराएन छन्’, मेयर लामाले भन्नुभयो ।
हेटौंडा उपमहानगरपालिकाले गत आर्थिक वर्ष २०७८÷७९ मा ७५ दशमलव ७४ प्रतिशत मात्रै खर्च गर्न सकेको विवरण सार्वजनिक गरेको छ । १ अर्ब ३० करोड १७ लाख रुपैयाँ चालु बजेट रहेको उपमहानगरपालिकाले १ अर्ब ११ करोड ५५ लाख रुपैयाँ मात्रै खर्च गर्न सकेको छ । यस्तै, पूँजीगत बजेट १ अर्ब ६१ करोड १५ लाख रुपैयाँ रहेकोमा १ अर्ब ८ करोड ३७ लाख रुपैयाँ खर्च गर्न सकेको छ ।
हेटौंडा उपमहानगरपालिकाले आर्थिक वर्ष २०७८÷०७९ मा आन्तरिकतर्फ २८ करोड ४२ लाख ८२ हजार रुपैयाँ राजश्व संकलन गरेको उल्लेख गरेको छ । जसमा सिफारिस दस्तुर २ करोड ८८ लाख रुपैयाँ संकलन भएको छ । उपमहानगरपालिकाले नक्सा पास दस्तुरमा २ करोड ३७ लाख रुपैयाँ संकलन गरेको छ । व्यवसाय करमा १ करोड ७९ लाख ४४ हजार रुपैयाँ संकलन गरेको उपमहानगरपालिका कार्यालयको प्रतिवेदनमा उल्लेख छ । १९ वटै वडाबाट ५ करोड ३२ लाख रुपैयाँ संकलन गरेको देखिन्छ । नदिजन्य पदार्थ विक्रिबाट ४ करोड ३० लाख रुपैयाँ संकलन गरेको छ । हेटौंडा उपमहानगरपालिकाको २ अर्ब ९१ करोड ९३ लाख रुपैयाँ कूल बजेट रहेकोमा २ अर्ब २० करोड ५२ लाख रुपैयाँ खर्च भएको छ ।
हालसम्म उपमहानगरपालिकाले आर्थिक वर्षको अन्त्यसम्ममा २५ वटा ऐन, ४ वटा नियमावली, २९ वटा कार्यविधि, १४ वटा निर्देशिका तयार पारिसकेको थियो भने २ वटा संशोधन कार्यविधि निर्माण गरेको जनाएको छ । समाजकल्याण शाखा अन्तर्गत ४५ दशमलव ५८ प्रतिशत वित्तीय प्रगति भएको देखिन्छ । जसमा १ करोड २१ लाख रुपैयाँ बजेट विनियोजन भएकोमा ५५ लाख ३८ हजार रुपैयाँ मात्र खर्च भएको थियो ।
उपमहानगरपालिकाको प्रगति विवरण अनुसार २०७८ साउनदेखि ०७९ असारसम्म १ सय ८४ वटा मुद्दा दर्ता भएका थिए । अघिल्लो आवको बाँकी मुद्दा ४८ वटा, मिलापत्र १ सय २७ थान, अदालत जान सुनाईएको ८ थान, मुद्दा फिर्तँ २ थान, पक्षहरु उपस्थित नभएको १७ थान, मुलतबी १ थान, मेलमिलाप हुन नसकेको ३६ थान, प्रक्रियामा रहेको ४१ थान रहेको जनाएको छ ।
भौतिक प्रगतिमा कंक्रिट सडक र ग्राभेल ७० दशमलव ८७ किलोमिटर, कालोपत्रे सडक २ दशमलव २८ किलोमिटर, सडक नयाँ ट्र्याक १ दशमलव ८० किलोमिटर, कल्भर्ट २० वटा, ग्राभेलिड्ड ११ दशमलव ५८ किलोमिटर, सिँचाई २ वटा, तटबन्ध १५ वटा, विद्यालय पूर्वाधार २० वटा, मन्दिर ४५ वटा, शौचालय ८ वटा, सामुदायिक भवन १६ वटा, खेलकुद पूर्वाधार ३ वटा, स्वास्थ्य केन्द्र भवन निर्माण ९ वटा, पर्यटन पूर्वाधार ७ वटा, गुम्बा निर्माण र स्तरीकरण १६ वटा गरेको छ ।
