हेटौंडाः हेटौंडा–५ स्थित पिप्लेमा जारी ८ “ए” साइड फुटबल प्रतियोगिताको सेमिफाइनल समिकरण पुरा भएको छ । शनिबार बिहान क्वाटरफाइनलका खेलहरु सम्पन्न भएसँगै सेमिफाइनल समिकरण पुरा भएको हो । शनिबार बिहान भएको पहिलो क्वाटरफाइनलको पहिलो खेलमा हेटौंडा फुटबल एकडेमी “ए” लाई १–० गोलले हराउँदै भुटनदेवी युवा क्लब सेमिफाइनल प्रवेश गरेको छ ।
यस्तै दोस्रो खेलमा कमाने फुटबल एकडेमीलाई पनि १–० गोलले हराउँदै एफसी डारिमटार सेमिफाइनलमा प्रवेश गरेको छ । तेस्रो खेलमा न्यु स्टारलाई हेटौंडा फुटबल एकेडेमी “बी”ले ट्राइब्रेकरमा २–१ गोलले हराएको छ । निर्धारित समय गोलरहित बराबरीपछि खेल ट्राइब्रेकरमा धकेलिएको थियो । चौंथो खेलमा एफसी धापले रुद्रेश्वर युवा क्लबलाई १–० गोलले हराउँदै सेमिफाइनल प्रवेश गरेको छ ।
प्रतियोगिताको सेमिफाइनका खेलहरु आजै हुँदैछ । आज दिउँसो २ बजे हुने पहिलो सेमिफाइनलको खेलमा एफसी धाप र हेटौंडा फुटबल एकेडेमी “बी” बिच प्रतिस्पर्धा हुनेछ । यस्तै दिउँसो ३ बजे भुटनदेवी युवा क्लब र एफसी डारिमटारबिच प्रतिस्पर्धा हुनेछ । प्रतियोगिताको फाइनल खेल भोलि आइतबार हुनेछ । प्रतियोगितामा प्रथम हुने टिमले नगद ४० हजार रुपैयाँसहित शिल्ड, मेडल तथा उपविजेता टिमले नगद २० हजार रुपैयाँसहित शिल्ड, मेडल र प्रमाणपत्र प्राप्त गर्नेछन् ।
