हेटौंडाः जेसीआई हेटौंडा लेडीको आयोजनामा भएको वक्तृत्वकला प्रतियोगितामा उचित बजगाईँ प्रथम भएका छन् । जेसीजको साताव्यापी कार्यक्रम अन्तर्गत मंगलबार भएको प्रतियोगितामा बजगाईँ प्रथम हुन सफल भएका हुन् । यस्तै सुनिल न्यौपाने द्वितीय, सुदिन पौडेल तृतीय र मधु यादव सान्त्वना भएका छन् ।
‘प्रभावका लागि कार्य’ विषयक वक्तृत्वकला प्रतियोगिता स्व. बुद्धरत्न शाक्यको स्मृतिमा भएको थियो । जेसीआई हेटौंडा लेडीकी अध्यक्ष कविता पौडेलको सभाध्यक्षता तथा मकवानपुर बहुमुखी क्याम्पसका प्रमुख डा. शंकर प्रसाद उपाध्यायको प्रमुख आतिथ्यमा कार्यक्रम भएको थियो । कार्यक्रम एलिसा न्यौपानेको संयोजकत्वमा भएको हो ।
साहित्यकार एवम् उपप्राध्यापक निमेष निखिल, उपप्राध्यापक मिरा शर्मा, जेसीआई हेटौंडा लेडीकी पूर्वअध्यक्ष सुशीला पौडेलले निर्णायकको भूमिका निर्वाह गर्नुभएको थियो । कार्यक्रममा जेसीआई हेटौंडा लेडीकी निवर्तमान अध्यक्ष प्रतिमा श्रेष्ठ, जेसीआई हेटौंडाका कार्यकारिणी उपाध्यक्ष शिव कुमार श्रेष्ठ, जेसीआई बस्तिपुरको कार्यकारिणी उपाध्यक्ष अमृत पाठक लगायतको उपस्थिति थियो ।
