हेटौंडाः मकवानपुर प्रहरीले लागुऔषध गाँजासहित शनिबार २ जनालाई पक्राउ गरेको छ । पक्राउ पर्नेमा नुवाकोट जिल्लाको बिदुर नगरपालिका–१३ बस्ने ३१ बर्षीय प्रकाश तामाङ र पर्सा जिल्लाको ठोरी गाउँपालिका–३, बर्मानगर बस्ने ३४ बर्षीया चन्द्र कुमारी श्रेष्ठ रहेको प्रहरीले जनाएको छ ।
शनिबार विहान २ बजेर १५ मिनेटको समयमा हेटौंडा–१० राप्तीपुल नजिक पूर्व–पश्चिम राजमार्ग खण्डमा चितवनबाट हेटौंडातर्फ आउँदै गरेको बागमती प्रदेश ०१–०२५ च १९४२ नम्बरको तरकारी बोक्ने पिकअप गाडीबाट लागुऔषध गाँजा फेला पारेको हो । प्रहरीले सुरक्षाजाँच गर्नेक्रममा तरकारी बोक्ने क्रेटमा लुकाई छिपाई ल्याएको अवस्थामा लागुऔषध गाँजा ७४ किलो ७०० ग्रामसहित ३१ हजार सात सय रुपैयाँ बरामद गरेको प्रहरीले जनाएको छ । पक्राउ परेका तामाङ र श्रेष्ठलाई प्रहरी हिरासतमा राखी थप अनुुसन्धान भइरहेको प्रहरीले जनाएको छ ।
