हेटौंडाः पोखराका कवि अमृतको कविता कृति “एकान्त भिड” आज शनिबार हेटौंडामा वाचन तथा विमर्श गरिएको छ । नेपाली लेखक संघ मकवानपुरको आयोजनामा भएको कार्यक्रममा कवि तथा समिक्षक घनश्याम घिमिरेले कवि अमृतको कृतिबारे चर्चा तथा परिचर्चा गर्नुभएको थियो ।
समिक्षक घिमिरेले कविता सरल तथा राम्रो रहेको बताउनुभयो । नेपाली लेखक संघ मकवानपुरका अध्यक्ष छवि आनित्यको सभाध्यक्षता तथा नेपाली लेखक संघका केन्द्रीय अध्यक्ष तीर्थ श्रेष्ठको प्रमुख आतिथ्यतामा कार्यक्रम भएको हो । कवि अमृतले कृतिभित्रका ५ वटा कविताहरु वाचन गर्नुभएको सर्जक सञ्जाल मकवानपुरका संयोजक निमेष निखिलले जानकारी दिनुभयो । कविता संग्रह “एकान्त भिड”मा ८० वटा कविता समेटिएको निखिलले बताउनुभयो ।
