हेटौंडाः जनप्रिय माध्यामिक विद्यालय हेटौंडा १६ मा गणित विषय शिक्षणका लागि अत्याधुनिक ल्यावको मंगलबार उद्घाटन गरिएको छ । गणित विषय विभागका शिक्षक तथा विद्यार्थीहरुको सक्रियतामा निर्माण गरिएको ल्यावको हेटौंडा १६ का वडाअध्यक्ष रामकृष्ण कोईरालाको प्रमूख आतिथ्यतामा उद्घाटन गरिएको हो ।
कार्यक्रममा बोल्दै प्रमुख अतिथि कोईरालाले जनप्रिय माविको यस्तो गतिविधीले गर्दा पनि नमूना बन्न सफल रहेको र आगामी दिनमा पनि विगत जस्तै स्थानीय सरकारका तर्फबाट होस् वा ब्यक्तिगत तर्फबाट जुनसुकै सहयोग गर्न तयार रहेको बताउनुभयो । उहाँले शिक्षक विद्यार्थीको उत्साहजनक कार्यका लागि गणित विषय ल्यावको कोषमा रहनेगरि ब्यक्तिगत रुपमा १० हजार रुपैयाँ समेत कार्यक्रममा सिनियर म्याथ क्लवकी संयोजक सलिना गुर्मछानलाई हस्तान्तरण गर्नुभएको हो । यसैगरी व्यवस्थापन समिति सदस्य कृष्ण पनेरुले पनि ब्यक्तिगत रुपमा ५ हजार रुपैयाँ ल्याव कोषमा रहनेगरी हस्तान्तरण गर्नुभएको हो । कार्यक्रममा कक्षा १० की छात्रा द्वय स्नेहा दाहाल र सुरक्षा बञ्जाराले गणित विषय सम्वद्ध सामग्रीको नमूना प्रस्तुत गरेका थिए । गणित विषय दैनिक जीवनसँग प्रत्यक्ष जोडिएको विषय भएकाले बालबालिकालाई सिकाईमा सहजता ल्याउन ल्याव संचालनमा ल्याईएको हो ।
ल्यावको निर्माण र प्रयोगपछि जस्तासुकै अमूर्त विषयलाई पनि गर्दै र सिक्दै पद्दतीबाट एवम् जानेकोबाट नजानेकोतर्फ तथा अभ्यासबाट सुत्रतर्फ लैजान सकिने गणित विषय विभाग संयोजक भूपेन्द्र चौलागाईले बताउनुभयो । ल्यावको प्रयोगबाट बालबालिकामा वैज्ञानिक सोचतर्फ उन्मूख गराउन धारणा निर्माण गर्न सकिने पनि चौलागाईले बताउनुभयो । ल्यावमा अंकगणित, विजगणित तथा ज्यामितीय धारणा बसाउन प्रयोग हुने सामग्री र बालबालिकाका अन्य रचनात्मक सामग्री समेत रहेका छन् । कार्यक्रममा बोल्दै प्रधानाध्यापक नमराज अर्यालले छोटो समयमा निर्माण गरिएको हुनाले ल्यावको अझै विस्तार गरिने र विद्यालयले बालबालिकाको पठनपाठनमा आवश्यक कुनैपनि सामग्री अपुग हुन नदिने बताउनुभयो ।
विद्यालय व्यवस्थापन समितिका सदस्य कृष्ण प्रसाद पनेरुको अध्यक्षतामा भएको उद्घाटन समारोहमा रोटरी क्लव मकवानपुरका अध्यक्ष रामप्रसाद शर्मा शिक्षक अभिभावक संघका सदस्य बुद्धप्रसाद दाहाल, सहायक प्रधानाध्यापक रामआशिष मण्डल, हटिया जनप्रिय बहुमुखी क्याम्पस प्रमुख विजय नेपाल, शिक्षकहरु लक्ष्मी श्रेष्ठ, रविन श्रेष्ठ, कल्याणकृष्ण प्याकुरेल, सम्प्रस पौडेल, उमा श्रेष्ठ, अभिनन्द सुब्बा, युक्तलाल विश्वकर्मा, सुनिल गौतम लगायतको उपस्थिति रहेको थियो ।
