हेटौंडाः कोरोना भाइरस (कोभिड–१९) को संक्रमणले विश्वलाई आतङ्कित बनाएपछि नेपाल सरकारले मंगलबार बिहानदेखि लागु हुने गरी लकडाउन अर्थात आम नागरिकलाई घरमै सुरक्षित रहन निर्देशन जारी गरेको छ । जनताको स्वास्थ्यलाई मध्यनजर गर्दै विभिन्न राष्ट्रले लकडाउन गरेपछि विश्वमा अहिले सन्नाटा छाएको छ । नेपालमा पनि मंगलबारदेखि लकडाउन गरिएको छ । अहिले अत्यावश्यक सेवा बाहेकका सबै सेवा बन्द गरिएका छन् । शिक्षण संस्थाहरू भने चैत ६ गतेदेखि नै बन्द गरिएका छन् । मकवानपुरका विद्यालय पनि चैत ६ गतेदेखि बन्द भएपछि शिक्षकहरू अहिले फुर्सदमा छन् ।
फुर्सदको समयलाई सदुपयोग गर्दै कतिपय शिक्षकहरू सिर्जनात्मक काममा लागेका छन् भने कतिपय मनोरञ्जनात्मक कार्यक्रम हेरेर त कोही आफ्ना बालबालिकालाई सिर्जनात्मक काममा लगाएर दिन बिताउन थालेका छन् । हेटौंडा–६, चौघडाका शिक्षक सरोज लामिछाने अहिले घरमै सेल्फ क्वारेन्टाइनमा बस्दा सिर्जनात्मक काममा लाग्नु भएको छ । उहाँ शिक्षक सेवा आयोगको मावि तहको अङ्ग्रेजी विषयको विषयगत पुस्तकको तयारी गर्दै हुनुहुन्छ । साथै हिमालय टाइम्समा पनि शिक्षासम्बन्धी अङ्ग्रेजी भाषामा लेख प्रकाशन गर्नुहुन्छ । उहाँ अहिले यसको तयारी गर्दै हुनुहुन्छ । यस्तै हेटौंडा–११, थानाभर्याङ निवासी शिक्षक माधव गौतम घरमै बसेर विद्यालयको नतिजा प्रकाशनको तयारी गर्दै हुनुहुन्छ । वंशगोपाल माविमा अध्यापनरत शिक्षक गौतम विद्यालयको परीक्षा समितिमा हुनुहुन्छ । उहाँ नतिजा तयारी गर्दै हुनुहुन्छ । घरमै बसेर नयाँ सफ्टवेयरमा कक्षा नर्सरीदेखि ९ सम्मको प्राप्ताङ्क राख्ने काम गरिरहनुभएको छ ।
हेटौंडा–८, कमानेस्थित चन्द्रोदय माविका शिक्षक रमेशमोहन अधिकारी लकडाउनको समयलाई सदुपयोग गर्दै घरमै बसेर नेपाली व्याकरणसम्बन्धी किताबको तयारी गर्दै हुनुहुन्छ । कक्षा ९ देखि १२ सम्मका विद्यार्थीका लागि उपयोगी हुने र नयाँ शैक्षिकसत्रमा प्रकाशन गर्ने गरी अधिकारी अहिले पुस्तकको तयारी गर्दै हुनुहुन्छ । हेटौंडा–९ स्थित प्रगति माविका शिक्षक किशोर पराजुली भने यो समयमा शिक्षामूलक तथा प्रेरणात्मक चलचित्र हेर्ने गरेको बताउनुहुन्छ । यसबाहेक उहाँ पनि विद्यालयको नतिजा प्रकाशनको तयारी तथा एमफिलको लागि आवश्यक सामग्री तयार गरिरहनुभएको छ । बकैया गाउँपालिकाको हात्तिसुँडेस्थित बुद्ध माविका प्रधानाध्यापक छविलाल विकले पनि घरमै बसेर सिर्जनात्मक काम गरिरहनुभएको छ । बिक पनि विभिन्न लेख तथा पत्रपत्रिकाहरू पढिरहनुभएको बताउनुहुन्छ ।
हेटौंडा–१३, पदमपोखरीस्थित महेन्द्र माविका प्रधानाध्यापक विष्णु श्रेष्ठ घरमै बसेर विद्यालयको काम गरिरहनुभएको छ । आगामी शैक्षिकसत्रको नयाँ योजना बनाउने काम गरिरहेको उहाँले बताउनुभयो । प्रगति माविका प्रधानाध्यापक निरन्जनप्रसाद ढकाल पनि विद्यालयको आगामी शैक्षिकसत्रको योजना तयारी गर्दै हुनुहुन्छ । हेटौंडा–१२ स्थित बुद्ध माविका शिक्षक मनिलकुमार महतो आफ्ना बालबालिकालाई सिर्जनात्मक काममा लगाएर घरमै बस्ने गरेको बताउनुहुन्छ । उहाँ आफ्ना छोराहरूलाई विभिन्न चित्र तथा लेख्ने काममा लगाएर समय बिताइरहनुभएको छ ।
