हेटौंडाः मकवानपुर प्रहरीले ५ किलो ५०० ग्राम लागुऔषध गाँजासहित एक भारतीय नागरिकलाई पक्राउ गरेको छ । पक्राउ पर्नेमा भारतको छाप्रा जिल्ला सवलपुर बस्ने ७० बर्षीय गणेश राय रहेको जिल्ला प्रहरी कार्यालय मकवानपुरले जनाएको छ ।
बुधबार साँझ ६ बजेको समयमा ईलाका प्रहरी कार्यालय नेवारपानीबाट खटिएको प्रहरी टोलीले रायलाई पूर्व–पश्चिम राजमार्गअन्तर्गत हेटौंडा–१९, नेवारपानीबाट लागुऔषधसहित पक्राउ गरेको हो । गस्तीमा रहेको प्रहरीले शंकास्पद रुपमा बसिरहेको अवस्थामा रायलाई सुरक्षाजाँच गर्दा लागुऔषध गाँजा फेला परेको प्रहरीले जनाएको छ । रायलाई बुधबार जिल्ला अदालत मकवानपुरबाट १५ दिनको म्याद लिई थप अनुसन्धान भइरहेको प्रहरीले जनाएको छ ।
