हेटौंडाः राष्ट्रिय प्रजातन्त्र पार्टी (राप्रपा) मकवानपुरको बुधबार विशेष बैठक बसेको छ । विशेष बैठकबाट राप्रपा मकवानपुरको अध्यक्षमा शिवराम थापा नियुक्त हुनु भएको छ ।
राप्रपा मकवानपुरका पूर्व अध्यक्ष गुरुप्रसाद सापकोटा लगायत नेता कार्यकर्ताहरुले कमल थापाको नेतृत्व रहेको राप्रपा नेपाललाई साथ दिने निर्णय गरेपछि राप्रपा मकवानपुरको विशेष बैठक बसेर थापालाई अध्यक्षमा नियुक्त गरेको हो । अध्यक्ष थापाले बुधबार नै पदभार समेत ग्रहण गर्नुभएको छ ।
मंगलबार सापकोटासहित केही नेताहरुले पार्टीभित्र पछिल्लो समय सैद्धान्तिक बिचलन आएको, पार्टीमा बढ्दै गएको पूर्वाग्रही सोच, चिन्तन र संकीर्णताबाट पार्टी अगाडि बढ्न नसक्ने भन्दै पार्टीबाट राजिनामा दिएका थिए । पार्टीका केही नेताहरुले पनि राजिनामा दिएकोले भोली पार्टीलाई पूर्णता दिने कार्यक्रम रहेको छ । यस्तै, राप्रपा मकवानपुरले चैत २७ गते बृहत भेला गरेर आमसभा गर्ने कार्यक्रम रहेको छ ।
