हेटौंडाः मकवानपुरको मकवानपुरगढी गाउँपालिका बालमैत्री घोषणा हुने भएको छ । आर्थिक वर्ष २०७६/७७ मा बालमैत्री स्थानीय तह घोषणाको तयारी गर्ने निर्णय गरेको मकवानपुरगढी गाउँपालिकाले २०७७ साल माघ १९ र २० गते बालमैत्री स्थानीय शासन नीति अबलम्बन गर्ने सामूहिक प्रतिवद्धता गरेको थियो । मकवानपुरगढी गाउँपालिकाले चैत १२ गते शनिबार बालमैत्री गाउँपालिका घोषणा गर्दैछ ।
बिहीबार पालिकामै पत्रकार सम्मेलन गरेर गाउँपालिकाले प्रमुख चुनौतिको रुपमा बालविवाहलाई रोक्न सफल भएको र आगामी दिनमा पनि बालविवाह हुन नदिन आवश्यक सतर्कता कायमै राखिरहने गाउँपालिकाका अध्यक्ष विदुर हुमागाईले जानकारी दिनुभयो । गाउँपालिकाका ५ हजार ३ घरधुरी तथा जनसंख्या २५ हजार १ सय ५ रहेको छ । ८ हजार २ सय ९६ बालबालिका रहेको पालिकाले विद्यालय जाने उमेरका सवै बालबालिकालाई विद्यालय जाने सुनिश्चित गरेको पनि अध्यक्ष हुमागाईको भनाइ छ । उहाँले बालमैत्री घोषणापछि पनि आवश्यक काम गर्न पालिकाले ३ करोड रुपैयाँ बजेट विनियोजन गरेको जानकारी दिनुभयो ।
बालमैत्री पालिका घोषणाका लागि बालमैत्री स्थानीय शासन गाउँपालिका समिति गठन गरेको मकवानपुरगढी गाउँपालिकाले बालमैत्री स्थानीय शासन वडा समिति ८ वटै वडामा गठन गरेको बालमैत्री स्थानीय शासन समितिका सहसंयोजक कविराज हुमागाईले जानकारी दिनुभयो । उहाँका अनुसार पालिकास्तर तथा ८ वटै वडामा गाउँपालिका बालअधिकार समिति पनि गठन गरिएको छ । पालिकाका विद्यालय, स्वास्थ्य संस्था, वडा, पालिकास्तरमा बालअधिकार समितिमा बालबालिकाको सहभागितालाई समेत सुनिश्चित गरिएको गाउँपालिकाले जनाएको छ ।
