हेटौंडाः सर्लाहीको बागमती नगरपालिकामा जारी छैठौं संस्करणको राजर्षि जनक गोल्डकपको क्वाटरफाइनल खेलमा हेटौैंडाको पिप्ले युवा क्लबले हिमालयन शेर्पासँग भिड्ने भएको छ । पिप्ले र शेर्पाबीचको खेल बागमती नगरपालिका–११ स्थित स्वर्गीय सन्तोष श्रेष्ठ स्मृति खेलमैदानमा हुने पिप्ले युवा क्लबका प्रशिक्षक सुविन घिमिरेले जानकारी दिनुभयो ।
साविक विजेता पिप्ले र हिमालयनबीचको खेल आज आइतबार दिउँसो ३ बजे हुने प्रशिक्षक घिमिरेले जानकारी दिनुभयो । ‘गत वर्षको प्रतियोेगितामा सहभागी खेलाडीहरु प्रदेश प्रतियोेगितामा व्यस्त छन् । तर पनि नयाँ खेलाडीहरु थप गरेका छौं । यो वर्ष पनि गोल्डकप हात पार्ने लक्ष्य छ’, प्रशिक्षक घिमिरेले बताउनुभयो ।
गत बुधबार भएको उद्घाटन खेलमा ध्रुवतारा स्पोर्टिङ क्लब झापालाई १–० गोलले पराजित गर्दै शेर्पाले पिप्लेसँगको भेट पक्का गरेको हो । पिप्ले युवा क्लब यसअघिको पाँचौं संस्करणको प्रतियोगितामा विजेता बनेको थियो । मकवानपुरमा अहिलेसम्म सर्वाधिक राशिका गोल्डकप जित्ने पिप्ले युवा क्लब बनेको छ ।
प्रतियोगितामा लिग विजेता मछिन्द्र फुटबल क्लब, नेपाल पुलिस क्लब, सशस्त्र प्रहरीको एपीएफ क्लब, हिमालयन शेर्पा क्लब र न्युरोड टिम (एनआरटी) गरी पाँचवटा ‘ए’ डिभिजनका टोली सहभागी रहेका छन् । त्यस्तै, नवजनजागृति युवा क्लब सिमरा, सुदूरपश्चिम–११ धनगढी, केबीए ग्लोबल फुटबल क्लब चितवन, ध्रुवतारा स्पोर्टिङ क्लब झापा–११, विदेशी टिम एभिनिर फुटबल क्लब क्यामरुन र आयोजक बागमती युवा क्लब प्रतियोगितामा सहभागी रहेका छन् ।
प्रतियोगिताको विजेताले १० लाख १ हजार र उपविजेताले ५ लाख ५ सय पुरस्कार प्राप्त गर्नेछन् । प्रतियोगिताको फाइनल खेल चैत १३ गते हुनेछ ।
