हेटौंडाः प्रहरीले सोमबार ६ जनाको शव फेला पारेको छ । देशका विभिन्न स्थानमा बसोबास गरिरहेकै ठाउँमा उनीहरुको शव प्रहरीले फेला पारेको हो ।
काठमाडौं महानगरपालिका–१२, टेकु डेरा गरी बस्ने सिन्धुपाल्चोक जिल्लाको सुनकोशी गाउँपालिका–२ घर भएकी ४८ वर्षीया टेककुमारी घर्ती क्षेत्री आफ्नै कोठामा सोमबार मृत अवस्थामा फेला परेकी छिन् ।
सैगरी, काठमाडौंको नागार्जुन नगरपालिका–१०, स्युचाटारको अमरज्योति स्कूल नजिक सडकपेटीमा मोरङ सुन्दरहरैचा नगरपालिका–६, गोठगाउँ घर भई स्युचाटार बस्ने ७५ वर्षीय कृष्णबहादुर आचार्य मृत अवस्थामा फेला परेका छन् ।
भक्तपुरको चाँगुनारायण नगरपालिका–७, बागरेस्थित टहराभित्र हाल नाम, थर, वतन नखुलेकी अन्दाजी ४० वर्षीया महिलाको शव फेला परेको छ । ललितपुर महानगरपालिका–१०, कुपण्डोल बागमती पुलमुनि भक्तपुर चाँगुनारायण नगरपालिका–७, बागेश्वरी घर भएका ४५ वर्षीय बिनोद गुरुङ मंगलबार मृत अवस्थामा फेला परेका छन् ।
झापाको शिवसताक्षी नगरपालिका–११, सताक्षीधाम मन्दिरस्थित गुरुकुल भवनको अतिथिगृहको कोठामा भारत मुम्बई घर बताउने ५५ वर्षीय महेश शिवाजी पाटिन सोमबार मृत अवस्थामा फेला परेका छन् । यस्तै, धरान उपमहानगरपालिका–११, ओमशान्ति मार्गस्थित घरको प्यासेजमा ४५ वर्षीय प्रकाश तामाङ सुतेको अवस्थामा सोमबार मृत फेला परेका छन् ।
