हेटौंडाः अवैध सुनचाँदीका गरगहनासहित एक भारतीय नागरिकलाई मकवानपुर प्रहरीले पक्राउ गरेको छ ।
बिहीबार बिहान २ बजेको समयमा पूर्व–पश्चिम राजमार्गअन्तर्गत हेटौंडा–१५, रातोमाटे चेकपोष्टमा सुरक्षाजाँच गर्ने क्रममा प्रदेश २–०३–०२० प ८२४५ नम्बरको मोटरसाईकलमा सवार भारतको बिहार राज्यको जिल्ला सितामडी थाना परिहार पोष्ट अन्धौली–३, बिसनपुर का २२ वर्षीय सोलार साह भन्ने राजा साहलाई अवैध गहनासहित प्रहरीले पक्राउ गरेको हो ।
पथलैयाबाट हेटौंडातर्फ आउँदै गरेका साहको साथबाट प्रहरीले सुन र चाँदीका तिलहरी, झुम्का, फुली, बाला, पाउजु, सिक्री, ब्रासलेट, औंठी, गणेश लक्ष्मीको मूर्ती, पाउजु बरामद गरेको जनाएको छ । प्रहरीले साहको साथबाट २ लाख ५ हजार रुपैयाँ बराबरको सुन २४ ग्राम ०६२ मिलिग्राम र तथा २ लाख ३५ हजार रुपैयाँ बराबरको चाँदी २ किलो १८ ग्राम बरामद भएको छ । बरामद भएको गरगहनासहित साहलाई थप अनुसन्धानका लागि राजश्व अनुसन्धान कार्यालय पथलैया पठाईएको जिल्ला प्रहरी कार्यालय मकवानपुरले जनाएको छ ।
