हेटौंडाः हेटौंडा क्याम्पसको १३ औं क्याम्पस सभा आइतबार भएको छ । क्याम्पस सन्चालक समितिकी अध्यक्ष मुनु सिग्देलको अध्यक्षता तथा बागमती प्रदेशका मुख्यमन्त्री राजेन्द्रप्रसाद पाण्डेको प्रमुख आतिथ्यमा क्याम्पस सभाको उद्घाटन कार्यक्रम भएको हो । क्याम्पस सभामा अध्यक्ष सिग्देलले शिक्षा क्याम्पसको रुपमा स्थापित हेटौंडा क्याम्पसलाई प्राविधिक क्याम्पसको रुपमा विकास गर्ने योजना प्रस्तुत गर्नुभयो ।
बागमती प्रदेश सभामा सत्तारुढ दल नेकपा (एकीकृत समाजवादी) को प्रमुख सचेतक समेत रहनुभएकी अध्यक्ष सिग्देलले वार्षिक नीति तथा कार्यक्रम प्रस्तुत गर्नुहुँदै स्नातक तहमा इन्जिनियरिङ, कानुन र बीबीए जस्ता प्राविधिक कार्यक्रम थप्दै लैजाने बताउनुभयो । गुणस्तरीय शिक्षाका लागि स्थायी प्राध्यापकको दरबन्दीलाई प्राथमिकता दिने उल्लेख गर्नुभएकी अध्यक्ष सिग्देलले अवकासपछि पनि प्राध्यापक, कर्मचारीलाई अवकासपछि सम्मान गर्ने योजना प्रस्तुत गर्नुभयो । अध्यक्ष सिग्देलले चालु आर्थिक वर्षमा क्याम्पसको आनुमानित आय ६ करोड २ लाख रुपैयाँ रहने जानकारी समेत दिनुभयो ।
क्याम्पस सभाको उद्घाटन कार्यक्रमलाई सम्बोधन गर्नुहुँदै मुख्यमन्त्री राजेन्द्रप्रसाद पाण्डेले स्वास्थ्य र शिक्षालाई प्राथमिकता दिए देश विकासमा महत्त्वपूर्ण योगदान पुग्ने उल्लेख गर्नुभयो । कोरोनाको संक्रमणको दर घटेर नियमित पठनपाठन सुचारु भएपछि क्याम्पसले राजनीतिकका नेता र विद्यार्थी बीच हरेक हप्ता अन्तरक्रिया गर्न मुख्यमन्त्री पाण्डेले क्याम्पस प्रशासनलाई अनुरोध गर्नुभयो । क्याम्पस सभामा छात्रवृत्ति उपसमितिका संयोजक प्रदीप कोइरालाले कक्षा ११, १२ र स्नातक तहमा १ सय ६० जना विद्यार्थीलाई ७ लाख १३ हजार रुपैयाँ बराबरको छात्रवृत्ति वितरण गरिएको जानकारी दिनुभयो ।
कक्षा ११, १२ सहित स्नातक तथा स्नातकोत्तर तहमा शिक्षा, मानविकी र बाणिज्य संकायमा पठनपाठन हुने हेटौंडा क्याम्पसमा १ हजार ७ सय ५० जना विद्यार्थी अध्ययनरत छन् । क्याम्पस सभाको उद्घाटन समारोहमा हेटौंडा उपमहानगरपालिका ४ नम्बर वडा अध्यक्ष नवीन सिग्देलको पनि उपस्थिति रहेको थियो ।
