हेटौंडाः मनहरी बजारमा आइतबार बिहान टिप्परले मोटरसाइकललाई ठक्कर दिँदा एकजनाको मृत्यु भएको छ । मृत्यु हुनेमा मोटरसाइकलमा सवार चितवन जिल्लाको भरतपुर महानगरपालिका–१२ की ५५ वर्षीया तारादेवी रेग्मी रहेकी छिन् ।
पूर्व–पश्चिम राजमार्ग अन्तर्गत मनहरी–७ मा बिहान सवा ७ बजेको समयमा हेटौंडातर्फ आइरहेको ना १९ प २३२८ नम्बरको मोटरसाइकललाई सोही दिशाबाट आइरहेको ना २ क ४३१ नम्बरको टिप्परले ठक्कर दिँदा दुर्घटना भएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक जयश्वर रिमालले जानकारी दिनुभयो । दुर्घटनामा घाइते भएकी रेग्मीको उपचारको क्रममा चितवनमा मृत्यु भएको उहाँले बताउनुभयो ।
मोटरसाइकल चालक भने सामान्य घाइते भएका छन् । मोटरसाइकललाई ठक्कर दिने टिप्पर र चालक प्रहरीको नियन्त्रणमा रहेको जिल्ला प्रहरी कार्यालय मकवानपुरले जनाएको छ ।
