हेटौंडाः राष्ट्रिय सभा सदस्यको निर्वाचनका लागि बागमती प्रदेशमा निर्वाचन अधिकृतको कार्यालय बिहीबार स्थापना गरिएको छ । बिहीबार बिहान हेटौंडा–५ स्थित बागमती प्रदेश निर्वाचन कार्यालयमा निर्वाचन अधिकृतको कार्यालय उद्घाटन गरिएको हो ।
बागमती प्रदेशको निर्वाचन अधिकृतमा जिल्ला अदालत मकवानपुरको मुख्य न्यायाधीश डिल्लीरत्न श्रेष्ठ नियुक्त हुनुभएको छ । राष्ट्रिय सभामा कार्यकाल सकिने १९ जना सदस्य मध्ये बागमती प्रदेशका २ जना छन् । एकजना महिला र एकजना खुलातर्फका सदस्य पदमा माघ १२ गते मतदान हुनेछ ।
निर्वाचन अधिकृतको कार्यालय उद्घाटन कार्यक्रममा मकवानपुरका प्रमुख जिल्ला अधिकारी भरतमणि पाण्डे, प्रदेश निर्वाचन अधिकारी लुम्बनाथ पोखरेल, मकवानपुरका प्रहरी प्रमुख प्रहरी उपरीक्षक सुरेन्द्र बहादुर गुरुङको पनि उपस्थिति रहेको थियो ।
राष्ट्रिय सभा सदस्य निर्वाचनमा प्रदेश सभाका १०९ जना सदस्य तथा स्थानीय तहका प्रमुख, उपप्रमुख गरी २३७ जनाले मतदान गर्नेछन् । राष्ट्रिय सभा सदस्य पदका लागि हुने निर्वाचनको मतदान केन्द्र हेटौंडा औद्योगिक क्षेत्र व्यवस्थापन कार्यालयको सभाकक्षलाई तोकिएको छ ।
