हेटौंडाः मकवानपुरमा १२ देखि १७ वर्षसम्मका बालबालिकाहरुलाई कोभिड–१९ विरुद्धको मोडर्ना खोप लगाउन सुरु भएको छ । स्वास्थ्य तथा जनसंख्या मन्त्री विरोध खतिवडाले हेटौंडाको भुटनदेवि माध्यमकि विद्यालयबाट खोप कार्यक्रमको सुरुवात गर्नुभयो । मन्त्री खतिवडाले विद्यार्थीहरुलाई खोप लगाउन र परिवारमा जानकारी दिनसमेत आग्रह गर्नुभयो ।
खोप नलगाएकाहरुले अनलाइन फाराम भरेर खोप लगाउन मन्त्री खतिवडाले आग्रह गर्नुभएको हो । कोभिड–१९ बाट सुरक्षित रहन खोप नै उत्तम भएको मन्त्री खतिवडाले दाबी गर्नुभयो । स्वास्थ्य मन्त्री खतिवडा पनि भुटनदेवि माविको पूर्व विद्यार्थी हुनुहुन्छ । भुटनदेवी माविका करिब ७ सय विद्यार्थीलाई मोडर्ना खोप लगाइने विद्यालयका प्रध्यानाध्यापक माधव दाहालले जानकारी दिनुभयो ।
खोप लगाउने विद्यार्थीको अभिभावकलाई पनि जानकारी गराइएको उहाँको भनाई छ । मकवानपुर जिल्लामा ५५ हजार डोज मोडर्ना खोप आएको छ । जिल्लामा आएको ५५ हजार मध्ये ३५ हजार खोप हेटौंडा उपमहानगरले पाएको छ ।
स्थानीय तहले विद्यालयमै खोप केन्द्र बनाएर आइतबारबाट खोप लगाउन सुरु गरेको हो । खोप लगाउनको लागि अनिवार्य अन्य खोपहरु जस्तै अनलाइबाट फाराम भर्नुपर्ने हेटौंडा उपमहानगरका जनस्वास्थ्य निरीक्षक भोला चौलागाई बताउनुभयो । चौलागाईका अनुसार नगरका १०४ विद्यालय मध्ये आइतबार २० वटा विद्यालयमा खोप कार्यक्रम चलिरहेको छ ।
