हेटौंडाः वैकल्पिक खेलाडीका रुपमा मैदान प्रवेश गरेका राजन गोलेको ह्याट्रिक मद्दतमा थाहा नगरपालिकाले हेटौंडामा जारी अन्तरपालिका जिल्लास्तरीय पुरुष फुटबल प्रतियोगितामा फराकिलो जीत हात पारेको छ । सोमबार भएको दोस्रो खेलमा थाहाले मकवानपुरगढी गाउँपालिकालाई ४–० को फराकिलो गोलअन्तरले पराजित गरेको हो ।
जिल्ला समन्वय समिति मकवानपुरको आयोजना तथा मकवानपुर जिल्ला खेलकुद विकास समितिको व्यवस्थापनमा हेटौंडा–४, हुप्रचौरमा जारी प्रथम संस्करणको प्रतियोगिताअन्तर्गत् सोमबार भएको खेलमा जीत हासिल गर्दै थाहा नगरपालिका सेमिफाइनलमा प्रवेश गरेको छ । थाहाको जीतमा वैकल्पिक खेलाडीको रुपमा पहिलो हाफको ३४ औं मिनेटमा मैदान प्रवेश गरेका राजनले खेलको दोस्रो हाफको ६४ औं मिनेटमा पहिलो गोल गरेका थिए भने इन्जुरी समयमा थप २ गोल गर्दै ह्याट्रिक पुरा गरेका हुन् । राजन प्रतियोगिताको पहिलो ह्याट्रिककर्ता समेत बनेका छन् । यस्तै थाहाका लागि अर्को एक गोल सन्देश बलले खेलको ६७ औं मिनेटमा गरेका थिए । राजन म्यान अफ दि म्याच घोषित भए ।
यस्तै, यसअघि भएको सोमबारको पहिलो खेलमा टाइब्रेकरमा जीत निकाल्दै बागमती गाउँपालिका पनि प्रतियोगिताको सेमिफाइनलमा प्रवेश गरेको छ । खेलमा बागमतीले ईन्द्रसरोवर गाउँपालिकालाई टाइब्रेकरमा ३–१ गोलअन्तरले पराजित गरेको हो । निर्धारित ८० मिनेटको खेल २–२ गोलको बराबरीमा सकिएपछि खेल टाइब्रेकरमा धकेलिएको थियो । खेलमा सुरुवाती अग्रता ईन्द्रसरोवरले लिए पनि बागमतीले खेलमा पुनरागमन गर्दै बराबरी गर्न सफल भएको थियो । खेलको पहिलो हाफको नवौं मिनेटमा नै ईन्द्रसरोवरले मिलन लामाको गोलबाट अग्रता बनाएको थियो । २० औं मिनेटमा बागमतीका कप्तान आकाश राना मगरले गोल गर्दै खेललाई १–१ गोलको बराबरीमा ल्याएका थिए ।
२७ औं मिनेटमा नै ईन्द्रसरोवरका खेलाडी बिजय लामाले फ्रीकिकमार्फत् गोल गर्दै पुनः अग्रता बनाउन सफल भएका थिए । बिजयको फ्रीकिक प्रहार बागमतीका गोलरक्षकले ठम्याउन नसक्दा गोल हुन पुगेको थियो । खेलको दोस्रो हाफको इन्जुरी समयमा बागमतीका आकाशले दोस्रो गोल गर्दै खेललाई २–२ गोलको बराबरीमा ल्याएसँगै बागमती हारबाट जोगिएको हो । टाइब्रेकरमा ईन्द्रसरोवरका १ खेलाडीको प्रहार बाहिरिन पुग्दा २ खेलाडीको प्रहार बागमतीका गोलरक्षक उमेश पाख्रिनले उत्कृष्ट बचाउ गरेका थिए । खेलका म्यान अफ दि म्याच पनि बागमतीका गोलरक्षक पाख्रिन नै घोषित भए ।
प्रतियोगिताअन्तर्गत् मंगलबार क्वाटरफाइनलतर्फको एकमात्र खेल हेटौंडा उपमहानगरपालिका र बकैया गाउँपालिकाबीच हुने आयोजकले जनाएको छ । दुबै टिमले प्रतियोगितामा दोस्रो खेल खेलिरहेका छन् । खेल तालिकाअनुसार यी दुई टिमले मात्र क्वाटरफाइनलका खेल खेल्नुपरेको छ । थाहा नगरपालिका, बागमती गाउँपालिकासँगै भीमफेदी गाउँपालिका भने पहिलो खेलमा जीत हात पार्दै सिधै सेमिफाइनल प्रवेश गरेका हुन् । बुधबार हुने सेमिफाइनलको पहिलो खेलमा भीमफेदी र थाहाबीच प्रतिस्पर्धा हुनेछ भने २३ गते हुने दोस्रो सेमिफाइनलमा बागमतीले हेटौंडा र बकैयाबीचको विजेता टिमको सामना गर्नेछ ।
