हेटौंडाः बाघको दाँतजस्तो देखिने बस्तु र स्रोत नखुलेको रकम सहित एक जनालाई मकवानपुर प्रहरीले पक्राउ गरेको छ । पक्राउ पर्नेमा हेटौंडा–६ का ५९ बर्षीय भीम राउत रहेको जिल्ला प्रहरी कार्यालय मकवानपुरले जनाएको छ ।
बिहिबार प्राप्त सूचनाको आधारमा जिल्ला प्रहरी कार्यालय मकवानपुरबाट खटिएको प्रहरी टोलीले राउतलाई हेटौंडा–१० स्थित बसपार्कमा चेकजाँच गरी उसको साथमा १ थान बाघको दाँत जस्तो देखिने बस्तु र स्रोत नखुलेको १ लाख ५२ हजार रुपैयाँ नगदसहित पक्राउ गरिएको जिल्ला प्रहरी कार्यालय मकवानपुरका प्रवक्ता प्रहरी नायव उपरिक्षक जयश्वर रिमालले जानकारी दिनुभयो ।
पक्राउ परेका राउतलाई नियन्त्रणमा लिई थप अनुसन्धान तथा कारवाहीको लागी जिल्ला वन कार्यालय तर्फ पठाउन जिल्ला प्रहरी कार्यालयका प्रमुख प्रहरी उपरीक्षक सुरेन्द्र बहादुर गुरुङबाट समन्वय भईरहेको पनि उहाँले बताउनुभयो ।
