हेटौंडाः मकवानपुरको बागमती गाउँपालिकामा जारी वडास्तरीय नकआउट फुटबल प्रतियोगिताको फाइनलमा आयोजक वडा नम्बर ४ का दुई टिम प्रवेश गरेका छन् । जारी प्रतियागिताको फाइनलमा आयोजक टिम ए र सी भिड्ने भएका हुन् ।
बागमती–४ झुरझुरेमा जारी प्रतियोगिताको सेमिफाइनल खेलमा विजयी बन्दै दुवै टिमले फाइनलमा भेट पक्का गरेका हुन् । शुक्रबार भएको सेमिफाइनलको पहिलो खेलमा आयोजक ए ले वडा नम्बर ५ लाई १–० गोल अन्तरले पराजित गरेको छ । यस्तै दोस्रो खेलमा भने आयोजक सीले वडा नम्बर २ लाई ३–२ गोलले पराजित गर्दै फाइनल प्रवेश गरेको प्रतियोगिताका संयोजक मुक्ति लामाले जानकारी दिनुभयो ।
प्रतियोगिताको उपाधी भिडन्त शनिबार दिउँसो १ बजे सुरु हुने आयोजकले जनाएको छ । प्रतियोगितामा प्रथम हुने टिमले नगद ६० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ भने द्वितीय हुनेले ३० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् ।
