हेटौंडाः प्रहरीले अवैध लागूऔषध गाँजाखेती फडानी गरी नष्ट गर्ने ३ दिने अभियान आइतबारबाट सुरु गरेको छ । अभियानअन्तर्गत् प्रहरीले कैलाश गाउँपालिकाको विभिन्न वडामा लगाइएको १७ बिगाहा १० कठ्ठा क्षेत्रको गाँजाखेती नष्ट गरेको हो ।
मंगलबारसम्म सञ्चालन हुने गाँजाखेती नष्ट गर्ने अभियानअन्तर्गत् प्रहरी प्रधान कार्यालय लागूऔषध नियन्त्रण ब्युरो कोटेश्वर काठमाडौं, बागमती प्रदेश प्रहरी कार्यालय हेटौंडा, बागमती प्रदेश दंगा नियन्त्रण गण र जिल्ला प्रहरी कार्यालय मकवानपुरबाट संयुक्तरुपमा प्रहरी टोली खटिएको छ । प्रहरी निरीक्षक अबिनाश अधिकारीको कमाण्डमा ७२ जनाको प्रहरी टोली खटिएको जिल्ला प्रहरी कार्यालय मकवानपुरले जनाएको छ ।
आइतबार कैलाश गाउँपालिका वडा नम्बर ४ को नामटार र डाँडा, वडा नम्बर ९ को जलेश्वर, टिमुरे र खैरेनीटार तथा वडा नम्बर १० को घैराङटारमा लगाएको अवैध लागूऔषध गाँजाखेती फडानी गरी नष्ट गरिएको प्रहरीले जनाएको छ ।
