हेटौंडाः हेटौंडा–५ स्थित पिप्लेमा स्कुटरले ठक्कर दिँदा घाइते भएको हेटौंडा–५ वडा प्रहरी कार्यालयमा कार्यरत प्रहरी जवानको स्वास्थ्य अवस्था गम्भीर बनेको छ । चितवनको पुरानो मेडिकलमा उपचारत प्रहरी जवान हरीको बुधबार बिहान सम्ममा स्वास्थ्य अवस्था झन गम्भीर बनेको जिल्ला प्रहरी कार्यालय मकवानपुरका प्रहरी निरीक्षक देवेन्द्र दासले जानकारी दिनुभयो ।
प्रहरी जवान हरीसहित मंगलबार साँझ सभा ७ बजेको समयमा वडा प्रहरी कार्यालयमा कार्यरत प्रहरी हवाल्दार नवराज श्रेष्ठलाई पनि स्कुटरले ठक्कर दिएको थियो । बा ५३ प ७४३३ नम्बरको स्कुटरले ठक्कर दिँदा प्रहरी जवान हरी, प्रहरी हवाल्दार श्रेष्ठ र स्कुटर चालक सहित ३ जना घाइते भएका थिए ।
घाइते भएका प्रहरी जवान हरीलाई मंगलबार साँझ नै चितवनको पुरानो मेडिकल कलेजमा उपचारको लागि लगिएको थियो । यस्तै सामान्य घाइते भएका प्रहरी हवाल्दार श्रेष्ठ र स्कुटर चालकको हेटौंडा–१ स्थित सन्चो हस्पिटलमा उपचार भइरहेका छन् ।
प्रहरी निरीक्षक देवेन्द्र दासका अनुसार प्रहरी जवान हरी र प्रहरी हवाल्दार श्रेष्ठ आफ्नो डयुटी सकेर फर्किरहेका थिए ।
