हेटौंडाः नेपालीहरुको महान चाड बडादशैंको तेस्रो दिन आज शनिबार देवी चन्द्रघण्टाको पूजा आराधना गरिँदैछ । दशैंको नवरात्रभर नौ वटा देवीस्वरुपको पूजा आराधना गर्ने हिन्दू धर्मको परम्पराअनुसार तेस्रो दिन देवी चन्द्रघण्टाको पूजाअर्चना गरिन्छ ।
नवरात्रिको तेस्रो दिनको पूजा विधि घटस्थापनाको जस्तै हो । घटस्थापनाको दिन राखेको जमरालाई बिहानै आत्मशुद्धिपश्चात् पवित्र जलले सिञ्चित गर्नुपर्छ । जमरा राखिएको स्थान नजिकैको कलशको वरिपरि नौवटा देवीको स्वरुपको प्रतिमूर्ति मानी पूजा गरिन्छ ।
तेस्रो दिन चन्द्रघण्टा भगवतीको पूजा आराधना अनि जलपूर्ण कलशमा पञ्चपल्लव चढाई अनन्त शक्तिस्वरुपा महाकाली, महालक्ष्मी र महासरस्वतीको पञ्चोपचारले पूजाआजा गर्ने वैदिक परम्परा रहेको छ । नवरात्रको चौथो दिन कुष्माण्डा, पाँचौं दिन स्कन्दमाता, छैटौं दिन कात्यायनी, सातौं दिन कालरात्रि, आठौं दिन महागौरी र नवौं दिन सिद्धिदात्रीको पूजा गर्ने गरिन्छ ।
