हेटौंडाः मकवानपुर प्रहरीले अवैध लागूऔषधसहित दुई जनालाई पक्राउ गरेको छ । प्रहरीले हेटौंडा–३ लेवटबाट करिब ५ सय ग्राम अवैध लागूऔषध गाँजा र वन्यजन्तुको जस्तो देखिने १ थान सिङसहित दुई जनालाई पक्राउ गरेको जिल्ला प्रहरी कार्यालय मकवानपुरले जनाएको छ ।
पक्राउ पर्नेहरुमा चितवन राप्ती नगरपालिका–२ बस्ने ४८ वर्षीय बिष्णुहरि अर्याल र सोही ठाउँ बस्ने २४ वर्षीय सरोज अर्याल रहेको जिल्ला प्रहरी कार्यालय मकवानपुरका प्रहरी नायब उपरीक्षक जयश्वर रिमालले जानकारी दिनुभयो ।
आइतबार साँझ चितवनबाट हेटौंडातर्फ आउँदै गरेको ना ६ ख ४५५ नम्बरको ट्रकलाई प्रहरी चौकी लेवटबाट खटिएको प्रहरीले जाँच गर्ने क्रममा लुकाई ल्याएको उक्त वस्तु र गाँजा बरामद भएपछि ट्रक चालक विष्णुहरि र ट्रकमा सवार सरोजलाई पक्राउ गरिएको प्रहरी नायब उपरीक्षक रिमालले बताउनुभयो ।
