हेटौंडाः मकवानपुर प्रहरीले लागुऔषधसहित २ जनालाई पक्राउ गरेको छ । खैरो हिरोईन जस्तो देखिने १४ ग्राम लागूऔषधसहित हेटौंडा–१० बाट २ जनालाई पक्राउ गरिएको जिल्ला प्रहरी कार्यालय मकवानपुरले जानकारी दिएको छ ।
प्रहरी चौकी भुटनदेवीबाट खटिएको प्रहरी टोलीले हेटौंडा–१०, राममन्दिर मोड नजिकै लागूऔषध बिक्री वितरण गरिरहेको छ भनी प्राप्त विशेष सूचनाका आधारमा हेटौंडा–१ घर भई राममन्दिर मोडमा डेरा गरी बस्ने ३१ वर्षीय हेमजंग बानियाँ र हेटौंडा–१ बस्ने ३४ वर्षीय सुरेश परियारलाई पक्राउ गरेको प्रहरीले जनाएको छ ।
बानियाँको साथबाट खैरो हिरोईन जस्तो देखिने १४ ग्राम लागूऔषध र नगद ३ लाख ६६ हजार २ सय ५० रुपैयाँ तथा परियारको साथबाट २ हजार रुपैयाँ फेला परेको जिल्ला प्रहरी कार्यालय मकवानपुरका प्रहरी प्रवक्ता प्रहरी नायव उपरीक्षक जयश्वर रिमालले जानकारी दिनुभयो । उनीहरुलाई उक्त लागूऔषधसहित नियन्त्रणमा लिएर थप अनुसन्धान भइरहेको रिमालले बताउनुभयो ।
