हेटौंडाः हेटौंडाको पल्पसा हलमा विभिन्न संघ संस्थाको सहकार्यमा आइसोलेशन सेन्टर संचालनमा आएको छ । मकवानपुर उद्योग वाणिज्य संघको नेतृत्वमा विभिन्न संघसंस्थाहरुको सहकार्यमा पल्पसा आइसोलेशन सेन्टर संचालनमा ल्याएको हो । बुधबार बागमती प्रदेश नेपाली कांग्रेस संसदीय दलका नेता इन्द्र बहादुर बानियाँले पल्पसा आइसोलेशनको उद्घाटन गर्नुभएको थियो ।
आइसोलेसनमा अक्सिजन सहित पूरुषको लागि २० वटा र महिलाको लागि १० वटा छुट्टाछुट्टै बेडको व्यवस्था गरिएको कोभिड हेल्प डेस्कका संयोजक कृष्ण कटुवालले बताए ।
डेक्सले एम्बुलेन्स सेवा समेत सञ्चालन गर्दै आइरहेको छ । स्वास्थ्यकर्मीहरुको निरन्तर रेखदेख रहनेगरी आइसोलेशनको लागि झुल, तकिया, टेलिभिजन, इन्टरनेटसहित नुहाउनको लागि चिसोपानी, तातोपानीसम्मको व्यवस्था गरिएको पल्पसा आइसोलेशन सेन्टरका संयोजक भुवनलाल श्रेष्ठले जानकारी दिनुभयो ।
