हेटौंडाः बागमती प्रदेशको प्रमुख प्रतिपक्ष दलका नेता शालिकराम जम्कट्टेलले प्रधामन्त्री केपि शर्मा ओलिले नजानिदो ढंगले राजतन्त्रको अभ्यास गर्न थालेका बताउनुभएको छ । उहाँले ओलिले बालुवाटारबाटै सबै कार्यहरु गर्दै आएको भन्दै पहिले नारायणहिटीमा श्री ५ ले जस्तै काम गर्न थालेको बताउनुभएको हो ।
प्रतिनिधि सभा दोस्रो पटक विघटन गरेर, नैतिकता गुमाएर भएपनि ओलि कुर्सिमा बसिरहन चाहेको उहाँको आशय थियो । उहाँले केपि ओलि गणतन्त्र विरोधी, संविधान विरोधी भएको नाराहरु अहिले जनताको नारा भएको बताउनुभयो । आक्रोशित हुँदै उहाँले केपि ओलि प्रतिगमनकारी नै भएको प्रस्ट पार्नुभयो । कुनै एक व्यक्तिको अनिर्णयको बन्दीमा सिंगो देश हुन नहुने उहाँले भन्नुभयो ।
बागमती प्रदेशको बजेट अधिवेशनको शुभकामना दिँदै उहाँले प्रतिपक्षले सरकारको ध्यानकर्षण गराएको र सरकारले आफ्नो मागप्रति सम्बोधन गरेकोमा सरकारलाई धन्यवाद दिनुभयो । मुख्यमन्त्री डोरमणि पौडेलले मदन भण्डारी फाउन्डेशनलाई कार्यविधि नै नबनाई दिन लागेको ५० लाख रुपैयाँ फिर्ता लिएको यसअघि सदनमा बताउनुभएको थियो ।
यता बागमती प्रदेश सरकारको आगामी बजेट सजिलै पास गर्न प्रतिपक्षले नदिने भएको छ । बजेट पास गर्न प्रतिपक्षको हैसियतमा नेता जम्कट्टेलले कुनै पनि बार्गेनिङ नगर्ने बताउनुभएको हो । उहाँले बहुवर्षीय योजनाहरु कसरी आएका छन् रातोकिताव आएपछि एक एक योजनाको बारे छलफल हुने बताउनुभयो । केपि ओलिको सिद्धान्तअनुरुप संसद विघिटन हुनुपर्ने अवस्था आएपनि त्यसको सामना गर्ने उहाँको भनाई छ । कोभिड केन्द्रित, सबै जनमुखि विकासे योजना नआएमा बजेट पास गर्ने नदिने उहाँले सरकारलाई चेतावनी समेत दिनुभयो ।
विपक्षी दल कांग्रेस संसदीय दलका नेता इन्द्र बानियाँले पनि रोग, भोक र खोप को व्यवस्थापन गर्नेगरी बजेट ल्याउन आग्रह गरेका छन् । बजेटले गरिब निमुखा जनता र कोभिड केन्द्रित भएर नल्याए, विपद्को राम्रो व्यवस्थापन नभए तथा बैज्ञानिक बजेट नआएमा कांग्रेसले त्यसमा आपत्ति जनाउने बताउनुभयो । राप्रपाकी सांसद रीना गुरुङले भने गणतन्त्र र संघीयता जनताको व्यवस्था नभएर नेताहरुको व्यवस्था भएको भन्दै त्यसको विरोध गर्नुभएको छ । उहाँले खुलेरै राजसंस्था कायम गर्नुपर्ने माग गर्नुभएको छ ।
