हेटौैंडाः राष्ट्रिय महिलाअधिकार दिवस २०७८ को अवसरमा आइतबार लैंगिक समानताका लागि पुरुष सहभागिता सञ्जाल (मेन इंगेज एलायन्स) मकवानपुरद्वारा हेटौंडा अस्पताललाई स्वास्थ्य सामग्री सहयोग गरिएको छ । कोभिड–१९ संक्रमितको उपचारमा उपयोगी हुने स्वास्थ्य सामग्रीहरु सहयोग गरिएको हो । सञ्जालको सदस्य संस्था इस्थर बेञ्जामिन स्मृति संस्थामार्फत प्राप्त स्वास्थ्य सामग्री सञ्जालमार्फत अस्पताललाई हस्तान्तरण गरिएको हो ।
लैंगिक समानताका लागि पुरुष सहभागिता सञ्जाल मकवानपुरका अध्यक्ष प्रकाश खतिवडाको अध्यक्षता तथा बागमती प्रदेश सभा सदस्य जुनेली श्रेष्ठको प्रमुख आतिथ्यमा स्वास्थ्य सामग्री हस्तान्तरण गरिएको हो । प्रदेश सभा सदस्य श्रेष्ठले हेटौंडा अस्पताल सञ्चालन तथा व्यवस्थापन समितिका अध्यक्ष राजेश प्रसाईंलाई स्वास्थ्य सामग्री हस्तान्तरण गर्नुभएको हो । सञ्जालले पिपिई २० सेट, थर्मल गन २० थान, अक्सिसिटर १५ थान, २० लिटर सेनिटाइजर, मास्क १ हजार थान, ग्लोब्स १ हजार थान र एक कार्टुन साबुन हस्तान्तरण गरिएको छ ।
यो वर्ष ‘महिलाको सुरक्षा र अधिकारः संकटकालिन व्यवस्थापन हाम्रो सरोकार’ भन्ने मूल नाराका साथ राष्ट्रिय महिलाअधिकार दिवस मनाइएको छ । स्वास्थ्य सामग्री ग्रहण गर्नुहुँदै हेटौंडा अस्पताल सञ्चालन तथा व्यवस्थापन समितिका अध्यक्ष राजेश प्रसाईंले सामुदायको सहयोगकै कारण कोभिड–१९ विरुद्ध लड्न सहयोग पुगेको बताउनुभयो । अहिले हेटौंडा अस्पतालमा कोभिड–१९ संक्रमित भई उपचार गर्न आउने गम्भीर प्रकृतिका विरामीको संख्यामा कमि आएको र गम्भीर अवस्थाका विरामीको उल्लेख्य संख्यामा उपचार गर्न सफलता मिलेको दावी गर्नुभएको छ । सहयोग सामग्री हस्तान्तरण कार्यक्रममा हेटौंडा अस्पतालका निमित्त मेसु डा. रामचन्द्र सापकोटाको पनि उपस्थिति रहेको थियो ।
