हेटौंडाः पिप्ले युवा क्लबले निर्माण गरिरहेको क्याम्पा मिनि रंगशालामा प्याराफिट बनाउन सिलान्याश गरिएको छ । हेटौंडा उपमहानगरपालिकाका मेयर हरि बहादुर महतले शनिबार प्याराफिटको सिलान्याश गर्नुभएको छ ।
उपमहानगरपालिकाले प्याराफिट निर्माण तथा रंगशाला व्यवस्थापनका लागि आगामी आ.व.मा पनि बजेट बिनियोजन गर्ने मेयर महतले जानकारी दिनुभयो । हेटौंडामा खेलकुदको विकासका लागि स्थायी रुपमा प्याराफिटको महसुस भइरहेको अवस्थामा पिप्ले युवा क्लबले गरेको कार्य सराहनिय रहेको उहाँले बताउनुभयो ।
चालु आर्थिक वर्षमा हेटौंडा उपमहानगरपालिकाको ४५ लाख रुपैयाँ बजेटबाट निर्माण सुरु हुन लागेको प्याराफिट निर्माणको लागि हेटौंडा ५ नं. वडा कार्यालय, मकवानपुर जिल्ला फुटबल संघ तथा स्थानिय स्तरबाट समेत सहयोग प्राप्त भएका छन् ।
पहिलो चरणमा ३ हजार दर्शक अट्ने बिच भागको प्याराफिट निर्माण हुने क्लबका अध्यक्ष सुशील घिमिरेले जानकारी दिनुभयो । यसैगरी सोही क्षमताका थप ३ वटा प्याराफिट निर्माण गरिने उहाँको भनाई रहेको छ । पहिलो चरणको प्यााराफिट निर्माणको काम २ महिनामा सम्पन्न हुने घिमिरेले बताउनुभयो ।
