हेटौंडाः नेपाल राष्ट्रिय खेलकुद महासंघको केन्द्रीय महासचिवमा मकवानपुरका धरम लामा चयन हुनुभएको छ । नेकपा एमाले निकट खेलकुद महासंघले मंगलबार काठमाडौंको राष्ट्रिय सभागृहमा आयोजना गरेको राष्ट्रिय भेलाले रमेश पौडेलको संयोजकत्वमा ५ सय ५१ सदस्यीय केन्द्रीय कमिटी निर्माण गर्दा मकवानपुरका लामा केन्द्रीय उपमहासचिवमा चयन भएका हुन् ।
यसैगरी मकवानपुरकै दीपक न्यौपाने केन्द्रीय सचिवमा चयन भएका छन् । कमिटीमा न्यौपानेसहित वासु नेपाल, सन्तोष वान्तावालगायत ७ जनालाई सचिवमा चयन गरिएको छ । यस्तै, कमिटीको वरिष्ठ उपाध्यक्षमा पर्शुराम बस्नेत, उपाध्यक्षमा प्रभातजंग कटुवाल, एकेन्द्र कुँवर, गोविन्द भट्टराई, ध्रुव आचार्यलगायत १२ जना चुनिएका छन् । यस्तै महासचिवमा मेघराज पौडेल चुनिएका छन् ।
