हेटौंडाः मकवानपुरको बागमती गाउँपालिकामा शुक्रबारबाट चौँथो बागमती गोल्डकप राष्ट्रिय फुटबल प्रतियोगिता सुरु भएको छ । नेकपा माओवादी केन्द्रका स्थायी कमिटी सदस्य तथा पूर्व गृहमन्त्री जनार्दन शर्माले खेलको उद्घाटन गर्नुभएको हो ।
उद्घाटन खेलमा ३–१ गोलअन्तरले नव जनजागृती युवा क्लबले आयोजक बागमती खेलकुद विकास समितिलाई पराजित गर्यो । खेलको दोस्रो हाफमा नव जनजागृती युवा क्लबका एलन राईले २ गोल र सुसान्त थिङले १ गोल गरेका थिए । आयोजकको तर्फबाट खेलाडी उमेश लोप्चनले दोस्रो हाफमा १ गोल गरेपनि खेललाई बराबरीमा ल्याउन सकेनन् ।
खेलको म्यान अफ दी म्याच एलन राई घोषित हुँदै नगद ५ हजार रुपैयाँ प्राप्त गरे । अब नवजनजागृती युवा क्लबले चैत्र १८ गते जाउलाखेल युथ क्लबसँग प्रतिस्पर्धा गर्नेछ । दश टिम सहभागि प्रतियोगिताको विजेताले नगद ८ लाख रुपैयाँ र उपविजेताले नगद ४ लाख रुपैयाँ प्राप्त गर्ने छन् ।
