हेटौंडाः मकवानपुर उद्योग वाणिज्य संघमा कृष्ण कटुवाल नेतृत्वको कार्यकालको समीक्षा गरिएको छ । शुक्रबार मकवानपुर उद्योग वाणिज्य संघको सभाकक्षमा समीक्षा कार्यक्रमको आयोजना गरिएको हो । संघका अध्यक्ष कृष्ण कटुवालले कठिन परिस्थितिका बीच पनि संघले महत्वपूर्ण कार्य गरेको दावी गर्नुभयो ।
अध्यक्ष कटुवालले आफू नेतृत्वको कार्यकालमा ५ तल्ले अतिथि सदन निर्माण पूरा गर्नु महत्वपूर्ण उपलब्धीको रुपमा व्याख्या गर्नुभएको छ । विभिन्न संघ, संस्था, व्यवसायीको सहयोगमा निर्माणाधिन अतिथि सदनको केही दिनमै उद्घाटन गरिने उहाँले बताउनुभयो । अतिथि सदन सञ्चालनमा आएसँगै संघको नियमित आम्दानीको स्रोत हुने दावी गरिएको छ ।
संघले व्यवसायीको हितमा विविध काम गरेको दावी गर्नुहुँदै अध्यक्ष्ँ कटुवालले प्रदेशको अस्थायी हुँदै स्थायी राजधानी हेटौंडामै कायम गर्न, व्यवसायीका समस्या समाधान गर्न, सडक विस्तार गर्दा व्यवसायी र घरधनी प्रभावित हुने जोखिमलाई ध्यानमा राखी सशक्त विरोध गर्न, विभिन्न प्राकृतिक विपद् तथा कोरोना महामारीमा समुदायका लागि राहत वितरणमा पनि संघको भूमिका रहँदै आएको बताउनुभयो । समीक्षा कार्यक्रममा संघका पूर्वअध्यक्षहरु उत्तम शर्मा ढकाल, भुवनलाल श्रेष्ठको पनि सहभागिता रहेको थियो ।
