भक्तपुरः भक्तपुर नगरपालिकाद्वारा आयोजित अन्तर नगरपालिका बुद्धिचाल प्रतियोगिताको उपाधि हेटौंडा उपमहानगरपालिकाले जितेको छ । सातौं तथा अन्तिम चरणको खेलमा २.५–१.५ अंकले पराजित गरी कुल १३ अंकसहित हेटौंडा उपमहानगरले उपाधि हासिल गरेको हो । उपाधिसँगै हेटौंडाले ट्रफि र नगद एक लाख पचास हजार रुपैयाँ पाएको छ ।
फाइनल खेलमा भिमेश्वर नगरपालिकाका लागि सुमित पन्तले वर्तमान नेपाल च्याम्पियन पुरुषोत्तम चौलागाईंलाई माथ गरे । तर हेटौंडाका सुरवीर लामाले भिमेश्वर नगरपालिकाका आशिष फूयाँल, रुपेश जैसवालले सुदीप तामाङलाई हराए भने मनिष हमाल र क्षितिज भण्डारीबीच बराबरी भयो ।
त्यसैगरी समान ११ अंक प्राप्त गरे पनि म्याच प्वाइन्टका आधारमा ललितपुर महानगरपालिका दोश्रो र काठमाडौं महानगरपालिका तेश्रो स्थानमा रह्यो । भक्तपुरको जगातिस्थित महेश्वरी बैंक्वेटमा सञ्चालित खेलमा ललितपुरका सजिन महर्जनले केशव श्रेष्ठ, बद्रिलाल नेपालीले रिजेन्द्र राजभण्डारी, सरोज महर्जनले नवीन तण्डुकार र सुमन राईले राजेन्द्र बज्राचार्यसँत बराबरी खेलेका थिए । ललितपुरले ट्रफि र नगद एक लाख तथा काठमाडौंले ट्रफि र नगद पचार हजार रुपैयाँ हात पारेको छ ।
स्वीस लिग ७ राउण्डको खेल भएको प्रतियोगितामा व्यक्तिगत प्रदर्शनमा बोर्ड नम्बर १ मा टोखा नगरपालिकाका मिलन लामा, बोर्ड नम्बर २ मा भक्तपुर नगरपालिकाका निकेन कुसाथा, बोर्ड नम्बर ३ मा दमक नगरपालिकाका चन्द्रप्रकाश नेपाल, बोर्ड नम्बर ४ मा हेटौंडा उपमहानगरपालिकाका रुपेश जैसवाल र बोर्ड नम्बर ५ मा भक्तपुर नगरपालिकाका केशब मानन्धर उत्कृष्ट घोषित भए । उनीहरुले जनही नगद पाँच हजार प्राप्त गरे ।
चारदिने प्रतियोगिताका विजयी तथा सहभागीहरुलाई आयोजक भक्तपुर नगरपालिकाका मेयर सुनिल प्रजापतिको सभाध्यक्षतामा एक समारोहबीच प्रमुख अतिथि संघीय सांसद प्रेम सुवाललगायतले ट्रफि, मेडल, प्रमाणपत्र एवम् नगद पुरस्कार वितरण गर्नुभयो । प्रतियोगितामा देशभरबाट २२ वटा नगरपालिकाका खेलाडीहरु सहभागी थिए ।
